Рөстәм Миңнеханов: “Безгә Франция бизнесы белән бәйләнештә тору мөһим”

Бүген “Сочи-2008” халыкара икътисади форумы кысаларында Татарстан Республикасы Премьер-министры Рөстәм Миңнеханов Франциянең Россиядәге илчесе Станислас Лабуле белән очрашты.
Очрашуда Татарстан ягыннан – Премьер-министр урынбасары – авыл хуҗалыгы һәм азык-төлек министры Марат Әхмәтов, икътисад министры Марат Сафиуллин, Татарстан Республикасының яшьләр эшләре, спорт һәм туристлык буенча министры Марат Бариев һәм Казан мэры Илсур Метшин, Франция ягыннан – бизнес-ширкәт вәкилләре катнашты.
Очрашу барышында яклар Франция һәм Татарстан бизнесы вәкилләре арасындагы хезмәттәшлекне киңәйтү турында фикер алыштылар.
“Безгә Франция бизнесы белән бәйләнештә тору мөһим, - диде Р.Миңнеханов. – Без инвестицияләр белән кызыксынабыз һәм хезмәттәшлегебезне киңәйтүгә һәртөрле ярдәм күрсәтергә әзербез”.
Франция бизнесын кызыксындыра алырлык проектлар буларак, Татарстан Премьер-министры, иң беренче чиратта, Универсиада-2013 кә әзерләнү белән бәйле рәвештә, Казан инфраструктурасының үсешен билгеләп үтте. Республика башкаласында бик масштаблы күп проектлар тормышка ашырылачак: аэропортны яңарту, яңа кунакханәләр һәм спорт корылмалары челтәрен төзү, транспорт инфраструктурасын үстерү. “Якындагы 4 елда Казан бик нык үзгәрергә тиеш”, - дип ассызыклап үтте Рөстәм Миңнеханов.
Татарстан Республикасы Премьер-министры шулай ук Татарстанның республика территориясендә, шул исәптән “Алабуга” махсус икътисади зонасында автокомпонентлар җитештерү буенча яңа предприятиеләр ачу белән кызыксынуын әйтеп китте. Р.Миңнеханов сүзләренә караганда, Франция белән Татарстанның ике як өчен дә файдалы булган хезмәттәшлеге өчен өлкәләр күп. Болар: нефть химиясе, машина төзелеше, авыл хуҗалыгы. Рөстәм Миңнеханов Франция илчесен һәм эшкуарлар делегациясен Казанга чакырды. Анда аларга республиканың инвестицион потенциалы тәкъдир ителәчәк.
Үз чиратында, Станислас Лабуле Татарстанның бай төбәк булуын һәм монда хезмәттәшлек өчен киң мәйдан ачылуын билгеләп үтте. Татарстан Республикасында “Шнайдер электрик” француз компаниясе уңышлы эшләп килә инде. “Татарстанда безне һәрвакыт бик яхшы каршы алалар, - диде С.Лабуле. – Май аенда Казанга килгәч, мин республика Президенты белән очраштым. Безнең хезмәттәшлегебез үскәннән-үсә барачак дип уйлыйм”.