Рөстәм Нигъмәтуллин ТР Сатып алулар буенча дәүләт комитеты коллегиясендә: 2022 елда республика заказчылары 233 млрд сумлык сатып алулар урнаштырды
Татарстан Республикасы заказчылары 2022 елда 233 млрд. сумлык сатып алулар урнаштырган. Бу хакта бүген Татарстан Республикасы Премьер-министрының беренче урынбасары Рөстәм Нигъмәтуллин Татарстан Республикасы Сатып алулар буенча дәүләт комитеты коллегиясенең йомгаклау утырышында хәбәр итте.
Утырышның төп темасы - 2022 елда Татарстан Республикасының Сатып алулар буенча дәүләт комитеты эшчәнлеге һәм 2023 елга планнар турында.
Ведомство эше турында йомгаклау нотыгы белән ТР Сатып алулар буенча дәүләт комитеты рәисе Руслан Сабиров чыгыш ясады.
Коллегия барышында 2022-2023 елларда сатып алулар өлкәсендәге законнарны үзгәртү, Россия Федерациясендә контракт системасын үстерү перспективалары, сатып алулар өлкәсендә контрольне гамәлгә ашыру буенча Россия Монополиягә каршы федераль хезмәт практикасы, шулай ук муниципалитетлар сатып алу тәҗрибәсе кебек темалар күтәрелде. Республика маркетинг үзәге эше турында доклад яңгырады.
Татарстан Республикасы Премьер-министрының беренче урынбасары Рөстәм Нигъмәтуллин, үз чиратында, 2022 ел катлаулы булуга карамастан, республиканың социаль-икътисадый үсеш темплары һәм сыйфаты саклануын хәбәр итте. Татарстан төп макроикътисадый күрсәткечләр буенча лидерлык позициясен саклап калды. Бюджетның тотрыклылыгын һәм нисбәтлелеген тәэмин итә алдык. Социаль йөкләмәләр тулысынча үтәлде, дип ассызыклады Рөстәм Нигъмәтуллин.
13 илкүләм проект кысаларында 43,7 млрд. сумлык 49 төбәк проекты гамәлгә ашырылган. Моннан тыш, 44 республика программасы буенча социаль билгеләнештәге һәм торак-коммуналь хуҗалык объектларын төзү һәм капиталь ремонтлау эшләре башкарылган.
Бу яңа уку елы башына 7 180 укучы урынына 9 мәктәпне файдалануга тапшырырга, 264 мәгариф объектына капиталь ремонт ясарга, «Безнең ишегалды» программасы буенча 1 212 ишегалдына капиталь ремонт ясарга мөмкинлек биргән
Әһәмиятле объектлар арасында Рөстәм Нигъмәтуллин Бәшир Рәмиев исемендәге югары технологияләр өлкәсендә технопарк булдырылган элеккеге «Спартак» фабрикасы биналары комплексын реконструкцияләүне билгеләп үтте. Чаллы шәһәрендә «Мастеровые» рус драма театры бинасын төзү, Казанда РФ Оборона министрлыгы госпитале төзелеше һәм башка бик күп объектлар бар.
Моңарчы күрелмәгән эшләр юллар төзелешендә бара.
Дәүләт комитетының, тармак министрлыкларының һәм муниципалитетларның җайга салынган эше нәтиҗәсендә сатып алу процедураларын тиешле дәрәҗәдә генә оештырып калмыйча, дәүләт һәм муниципаль контрактларның үтәлешен дә тәэмин итә алдык, диде Рөстәм Нигъмәтуллин. Ул искәрткәнчә, республика заказчылары узган елда 233 млрд. сумлык сатып алулар урнаштырган (сатулар буенча экономия – якынча 4 млрд. сум). Шул ук вакытта Дәүләт комитеты 7 млрд сумлык 970 үзәкләштерелгән сатып алулар үткәргән.
«Барлык заказчыларга сатып алу документларына катнашучыларның салымнар буенча бурычлары булмау турындагы таләпләрне кертү зарурлыгы турында искә төшерәм. Дәүләт комитеты контрольне тәэмин итүне сорыйм, - диде ул. - 1 декабрьгә салымнар буенча бурыч 13,5 млрд. сумга кадәр арткан. Асылда бу акчалар республикада социаль юнәлештәге программа чараларын киңәйтергә мөмкинлек бирер иде».
«Еш кына сатып алуларның нәтиҗәлелеген торглар нәтиҗәсендә экономияләү суммасы буенча бәялиләр. Тик биредә кайчагында контрактның башлангыч бәясен формалаштыруның дөреслеге турында сорау туа. Шуңа күрә Дәүләт комитетыннан аның вәкаләтләре кысаларында заказчылар белән бу мәсьәләдә методик ярдәм күрсәтүне дәвам итүегезне сорыйм», - диде Рөстәм Нигъмәтуллин.
Икенче проблема - сатып алына торган продукциянең яки күрсәтелә торган хезмәтнең сыйфаты. Әлбәттә, чынлыкта һәр клиент моның белән кызыксынырга тиеш. Ләкин контроль чаралар нәтиҗәсендә, мәсәлән, сыйфатсыз продукцияне кабул итүнең аерым очраклары ачыклана.
Шуңа бәйле рәвештә Дәүләт комитетының сыйфатсыз товар яки товарны кирәкле документларсыз җибәрә торган азык-төлек продукциясе белән тәэмин итүчеләр һәм җитештерүчеләр реестрын кертү турындагы тәкъдиме кызыксыну уята. «Дәүләт комитетыннан Роспотребнадзор тарафыннан җентекләп тикшерүләр һәм Министрлар Кабинетына килештерелгән тәкъдимнәр кертүләрен сорыйм, - дип мөрәҗәгать итте коллегиядә катнашучыларга Рөстәм Нигъмәтуллин. - Шул ук вакытта дәүләт һәм муниципаль заказчыларның игътибарын продукциянең сыйфатын контрольдә тотуны көчәйтүгә юнәлтәм».
«Дәүләт сатып алулары системасы - торглар уздыру процесслары турында гына түгел, бу намуслы көндәшлекне тәэмин итү, эшкуарлыкка, бигрәк тә кече һәм урта бизнеска ярдәм итү, бюджет чыгымнарының нәтиҗәлелеге аша төбәк икътисадын үстерү системасын формалаштыру турында да. Бу юнәлешләрнең барысы да хәзерге шартларда аеруча актуаль. Шуңа күрә Икътисад министрлыгы муниципалитетлар һәм Татарстан Республикасы Дәүләт заказы агентлыгы белән берлектә гамәлгә ашыра торган республика маркетинг үзәге проекты безнең өчен бик мөһим», - дип саный Рөстәм Нигъмәтуллин.
Ел нәтиҗәләре буенча РМҮ ресурсларында 4 меңнән артык республика эшкуары 193,5 млрд. сум күләмендә табыш алган, 44 нче һәм 223 нче федераль законнар буенча да, коммерциячел сатып алулар буенча да. Әлеге проект ярдәмендә эшкуарлар республикадан читтә дә сату базарын җайга сала алдылар, кертелгән санкцияләр аркасында сатып алып булмый торган продукциянең яңа производстволарын ача алдылар. Чынлыкта, республика маркетинг үзәге импортны алмаштыруны стимуллаштыру механизмына әверелде, дип ассызыклады Рөстәм Нигъмәтуллин.
Ул ТР Икътисад министрлыгына, муниципалитетларга һәм Дәүләт комитетына РМҮ тәэмин итүчеләренең дәүләт һәм муниципаль сатып алуларда катнашуын киңәйтү буенча уртак эшне дәвам итәргә кушты.
Ведомство эшенә нәтиҗә ясап, ТР беренче вице-премьеры Дәүләт комитеты коллективына 2022 елда башкарылган эшләре өчен рәхмәт белдерде һәм бурычларны, шул исәптән бүгенге утырышта куелган бурычларны тормышка ашыруда да уңышлар теләде.