Рөстәм Миңнеханов: 6 миллион тонна иген – ул Татарстан аграрчыларының зур уңышы”

Бүген Казан базарларында Татарстан районнарыннан килгән товар җитештерүчеләр шәһәрдә яшәүчеләр өчен традицион көзге ярминкәләр оештырдылар. Алар авыллардан игенчелек һәм терлекчелек продукциясе, шулай ук тере кош-корт, иген, төзелеш материаллары алып килгән.
Казанның Чехов һәм Мәскәү базарларында Татарстан Республикасы Премьер-министры Рөстәм Миңнеханов, Татарстан Республикасы Премьер-министры урынбасары – авыл хуҗалыгы һәм азык-төлек министры Марат Әхмәтов һәм шәһәр мэры Илсур Метшин булды.
Журналистлар белән әңгәмә барышында Рөстәм Миңнеханов монда күргәннәрдән алган тәэсирләре белән уртаклашты. Аның фикеренчә, авылда яшәүчеләр шәһәр кешеләрен авыл хуҗалыгы продукциясе белән тәэмин итү өчен барысын да эшләгәннәр. “Тулаем алганда, районнардан Казанга сыйфатлы продукция китерелгән, һәм ярминкәләрнең Татарстан Республикасы башкаласында гына түгел, аерым сәүдә мәйданчыкларында да узуы өчен, хәлдән килгәннең барысын да эшләргә кирәк. Бүген шәһәрдә яшәүчеләр актив рәвештә кышка бәрәңге, яшелчә, башка авыл хуҗалыгы товарлары алып куйды, бу ярминкәләрне оештыручы кешеләрне сөендерми калмый”, - диде Р.Миңнеханов.
“Сатып алучылар бәяләрдән дә канәгать. Мәсәлән, әле күптән түгел генә бәрәңге кыйбат тора иде. Бүген “икенче икмәк”нең килограммын 7 сумга сатып алып була. Башка төрдәге товарлар да бүген күпкә арзанрак тора. Ярминкәләрне оештыручылар бу мәсьәләгә бик җаваплы караганнар”, - дип ассызыклап узды Р.Миңнеханов. Үз чиратында, Казан хакимиятләре, авылда яшәүчеләр үз товарларын уңайлы шартларда сата алсын өчен, кулдан килгәннең барысын да эшләделәр.
Татарстан Хөкүмәте башлыгы барысын да кичә авыл хезмәтчәннәренең, 6 миллион тонна иген җыеп, яңа рекорд куюга ирешүләре белән тәбрик итте. “Бу әле уңышка ирешү өчен көч куйган бөтен авыл кешесенең зур җиңүе”, - диде Р.Миңнеханов.
Татарстан Республикасы Премьер-министры быел һава торышының Татарстан Республикасы аграрчылары өчен уңышлы булуын билгеләп узды. Моннан тыш, авыл хезмәтчәннәре тарафыннан да, Татарстан Республикасы Хөкүмәте ягыннан да хәлдән килгәннең барысы да эшләнде”, - дип нәтиҗә ясады ул.