Минтимер Шәймиев Болгар музей-саклаулыгында булды

Бүген Татарстан Республикасы Дәүләт Киңәшчесе, “Яңарыш” фондының Республика Попечительләр Советы рәисе Минтимер Шәймиев Болгар дәүләт тарих-архитектура музей-саклаулыгында булды, анда ул “Татарстанның мәдәни мирасы: борынгы Болгар шәһәре һәм Зөя утрау-шәһәре” проекты буенча археологик тикшеренүләр һәм реставрацияләү объектларын карады, гадәттәгечә “Мәктәпкә җыенырга ярдәм ит” республика хәйрия акциясендә катнашты.

Бу акция кысаларындагы балалар бәйрәме бүген “Яңарыш” фонды ярдәме белән май аенда корылган Фестиваль-вакыйгалар комплексында узды.

ТР Дәүләт Киңәшчесе Минтимер Шәймиев, ТР Президенты ярдәмчесе, ТР тарих һәм мәдәният Һәйкәлләрен яңадан торгызу Республика фондының башкарма директоры Татьяна Ларионова, ТР Спасс муниципаль районы башлыгы Камил Нугаев хәйрия оешмалары вәкилләре белән бергәләп, районның аз керемле гаиләдән булган беренче сыйныфка барачак 89 балага мәктәп ранецы һәм бүләкләр тапшырдылар.

Минтимер Шәймиев балалар һәм ата-аналар каршында чыгыш ясап, бу матур гадәт бөтен ил буенча бердәнбер, инде җиденче ел бөтен республика, барлык балалар өчен бертөсле шартлар булдырып, балаларны мәктәпкә озата, дип белдерде.

Минтимер Шәймиев шулай ук хәзерге көндә, Татарстан Президенты Рөстәм Миңнеханов карары буенча, 2013 елгы Универсиада өчен алынган транспорт чараларын һәм җайланмаларын мәгариф һәм мәдәният учреждениеләренә бүлеп бирү бара, дип хәбәр итте. Ул Болгар музей-саклаулыгына Универсиада Авылыннан 5 электрокар бүләк итте.

ТР Дәүләт Киңәшчесе һәм аны озата йөрүчеләр археологик тикшеренүләр һәм реставрация объектларын карадылар. Алар арасында: ике камералы төрбә һәм шәһәр кырыендагы Көньяк төрбә; Базар мәйданы – Җәмигъ мәчеттән көньяк-көнбатышка таба XIV йөзнең 40-50 елларына караган монументаль корылмалар казылмалары; Җәмигъ мәчет районында XII-XIV йөзләрдәге торак йортлар казылмалары. Шулай ук Хан мунчасы; Көнчыгыш төрбә һәм яңа казылмалар һ.б.
Күргәннәргә нәтиҗә ясап, Минтимер Шәймиев –“Без җир шарының теләсә кайсы ноктасыннан кунакларны яхшы каршы алырга тиешбез. Болгар һәм Зөя тарихи һәйкәлләр һәм туристлык үзәге буларак һәркемне җәлеп итәрлек булырга тиеш”,-диде.