Равил Мотыйгуллин: ТРның яшь геологлары Казандагы ачык кыр олимпиадасында лаеклы чыгыш ясадылар

1августтан 10на кадәр Казанда Яшь геологларның IX Бөтенроссия ачык кыр олимпиадасы узды, ул Россиянең төрле төбәкләрендә ике елга бер тапкыр уздырыла.
Быелгы олимпиада нәтиҗәләре буенча Казан кусты - 9 нчы урын, Әлмәт кусты 7нче урын алды. “Моңа кадәр Томскида узган олимпиадада безнең команданың арттан өченче урын алуын исәпкә алсак, бу юлы Татарстанның яшь геологларының лаеклы чыгыш ясавы турында әйтә алабыз”, -ди ТР Җир асты байлыкларыннан файдалану идарәсе җитәкчесе Равил Мотыйгуллин.

Ул бу хакта бүген ТР Хөкүмәте йортында узган брифингта белдерде. Яшь геологларның IХ Бөтенроссия ачык кыр олимпиадасы йомгакларына багышланган матбугат очрашуында шулай ук ТР экология һәм табигый байлыклар министры Артем Сидоров, “Татнефть” ААҖ геология-разведка идарәсе җитәкчесе Марат Мәһдиев катнашты.

Казанның “Солнечный” һәм “Заречье” балаларны савыктыру лагерьлары базасында узган чарада Россия төбәкләреннән һәм БДБ илләреннән (Казакъстан, Үзбәкстан, Украина, Таҗикстан) 40 команда катнашты. Ярышларда Татарстанны ике команда - “Селенит” һәм “Девон” тәкъдим итте. Беренчесе Казан, Тәтеш районы укучыларыннан торса, икенче команда составында Бөгелмә, Әлмәт, Азнакай районнары малайлары һәм кызлары чыгыш ясады.

Равил Мотыйгуллин безнекеләрнең быелгы уңышлы чыгышын максатчан әзерләнү нәтиҗәсе дип бәяли. Аңа әзерлек 2011 елда ук башланган. Казан федераль университеты һәм Әлмәт нефть институты каршында 30 ар кешедән мәктәп факультетлары формалаштырылган, бу сәләтле балалар белән максатчан шөгыльләнгәннәр. Балалар узган ел Карабашта җыенда катнашкан, Пермьгә, Мәскәүгә, Казакъстанга ярышларга барган. Равил Мотыйгуллин бу юлы ачык кыр олимпиадасының тагын да көчлерәк конкуренция шартларында узуын ассызыклады.

Аның белдерүенчә, әлеге олимпиада укучыларны кырыс шартларда чыныктыру ягыннан да әһәмиятле. Яшь геологлар бу мәктәпне узып, учак ягарга, урында ориентлашырга, беренче ярдәм күрсәтергә әзерлекле булып чыга.

Хәзер иң мөһиме -бу егетләр һәм кызларның алга таба геология белгечлеге буенча укуларын дәвам итүләре, ди ул. Ә өлкәннәрнең бурычы – аларга һөнәри юнәлеш бирү.

“Дәүләт аттестация комиссиясе әгъзасы буларак, дәүләт имтиханнарын кабул итүдә, диплом эшләрен яклауда катнашам. Кызганычка, геология белгечлеге буенча вуз тәмамлаучыларның кайберләренең киләчәктә геолог буларак эшләргә дип күзләре янып тормый. Геологиягә очраклы кешеләр түгел, ә чынлап кызыксынган кешеләр килергә тиеш. Безнең бурыч- бу һөнәрнең абруен күтәрү, мәктәптән үк балаларда бу предметка кызыксыну уяту”,- ди Равил Мотыйгуллин.

Яшь геологларның X Бөтенроссия ачык кыр олимпиадасы 2015 елда Төмәндә узачак.