Татарстанда бурычлыларны “Дорожный пристав” республика юлларында эзли башлый

Татарстанда бурычлыларны “Дорожный пристав” республика юлларында эзли башлый. Бүген ТР Хөкүмәте йортында республика муниципалитетлары белән видеоконференция режимында барган брифингта Россия суд приставлары федераль хезмәтенең ТР буенча идарәсе башлыгы Радик Ильясов шундый һ.б. белешмәләр бирде.

Аның сүзләренчә, алга таба, төгәлрәге, Татарстанда 20 августтан башлап бурычлы затларны транспорт чарасы буенча автомат режимда эзли торган “Дорожный пристав” аппарат-программа комплексы гамәлгә кертелә. Хәзерге вакытта республиканың суд приставлары хезмәтенә андый 2 портатив һәм 5 күчмә (алары автомобильгә беркетелгән) шундый аппарат ТР Президенты Рөстә Миңнеханов ярдәмендә алдырылган.

Шул рәвешле, “Дорожный пристав” комплекслары белән эш күрсәткечләре тагын да югарырак булачак, дип саный Россия суд приставлары федераль хезмәтенең ТР буенча идарәсе башлыгы Р.Ильясов. Башта Казанда, аннары республиканың Чаллы, Түбән Кама, Әлмәт кебек эре шәһәрләрендә һәм муниципаль районнарфнда бурычлыларны “Дорожный пристав” комплексы белән җиһазландырылган һәм теләсә кая тикшерергә, бурычын түләттерергә вәкаләте булган махсус оештырылган төркем мәгълүмат базасы аша эзләп йөриячәк. Портатив комплекс дипломатны хәтерләтә, күчмә дигәне автомобильгә урнаштырылган. Соңгысы юлларда ЮХИДИ хезмәте белән берлектә бурычлыларны транспорт номеры буенча туктатып күзгә-күз эшләсә, портативы туктап торган (әйтик, урамда, торак йорт яки бина янында, парковкада һ.б. урында) транспорт арасыннан хуҗасы бурычлыны “таный” һәм хуҗасын суд приставлары көтеп алып, аның белән эшли башлый.

Бурычлының бурычыннан котылу юлы ике – яки ул акчалата түли, яисә милекләтә: әйтик, бурычы 500 сумга кадәр булса, я автомагнитоласы, я видеонавигаторы, я запас тәгәрмәче тартып алына, әгәр ул суммадан артык булса, - автомобиленә кадәр, шулай итеп, бу бурычның суммасыннан тора.

Хәзерге вакытта ТРда бурычлылар буенча 140 мең эш башкарма производствода, димәк, аларны каптыру күпкә җиңелләшәчәк. Пермь краенда җитештерелгән бу комплекслар Татарстанда сынауны уңышлы узган. Андыйлар Санкт-Петербургта һәм Россиянең башка кайбер төбәкләрендә файдаланылышта, ләкин әле киң таралышта түгел, дип аңлатты республиканың баш суд приставы Радик Ильясов.

Радик Ильясов сүзләренчә, “Дорожный пристав” Татарстанда бурычларны тагын да нәтиҗәлерәк җыярга һәм шуның белән республика бюджетын тулыландырырга мөмкинлек бирәчәк.