Татарстан Премьер-министры Ганноверда IAA Nutzfahrzeuge йөк һәм коммерцияле автомобильләр күргәзмәсе – 2008 дә булды

26 нчы сентябрьдә Татарстан Республикасы Премьер-министры Рөстәм Миңнеханов Германиягә эш сәфәре барышында Кельнның үзәк стадионын карап чыкты.
46 мең тамашачыга исәпләнгән стадионны GMP немец архитектура-дизайн компаниясе төзеде. Әлеге компания инде бик күп төзелеш объектларын сафка бастырган. Шулар арасында Берлиндагы Олимпия стадионы, Кельндәге “РейнЭнерджи” футбол стадионы, шулай ук Шеньчжендәге (Кытай) күргәзмә һәм конгресс-үзәкләр бар.
Татарстан Республикасы башлыгы Кельннең үзәк стадионын Казан спорт инфраструктурасының алга таба үсеш перспективаларын билгеләү һәм стадион төзелешенең кулайрак проектын сайлау өчен карап чыкты (2013 ел Универсиадасын үткәрүгә әзерлек кысаларында).
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов хәбәр иткәнчә, Кельнгә визит GMP немец архитектура-дизайн компаниясе чакыруы буенча оештырылган.
Сәфәрдә Татарстан Республикасы башлыгын Казан мэры Илсур Метшин озатып йөрде.
Шул ук көнне Татарстан Республикасы Премьер-министры Рөстәм Миңнеханов Ганноверның (Германия) Күргәзмә үзәгендә ачылган 62 нче IAA Nutzfahrzeuge йөк һәм коммерцияле автомобильләр күргәзмәсе – 2008 дә булды. Күргәзмә ике елга бер тапкыр үткәрелә һәм авыр йөк автомобильләре, шәһәр автобуслары, махсус техника һ.б. өлкәсендә дөнья автосәнәгате яңалыкларын күрсәтә.
Күргәзмә кысаларында Татарстан Министрлар Кабинеты башлыгы “Кнорр-Бремзе”, “Цандар Фабрик” (ZF), “Федерал Могул” һәм “Даймлер Трак” компанияләре җитәкчелеге белән очрашты.
Ганновердагы очрашуларда шулай ук “КАМАЗ” ААҖ генераль директоры Сергей Когогин, “Тройка Диалог” компанияләр төркеменең идарә итүче директоры Сергей Скворцов, Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов катнашты.