Илдар Халиков: Дөнья тирәли веломарафон – ул Татарстан спортчыларының кыю бурычлар куеп, аларны үтәргә сәләтле икәнен раслый

Бүген Татарстан Республикасы Хөкүмәте йортында Премьер-министр Илдар Халиков дөнья тирәли веломарафонда катнашучылар белән очрашты.
Очрашуда шулай ук ТР яшьләр эшләре, спорт һәм туризм министры Рафис Борһанов катнашты.

Искә төшерәбез, веломарафон берьюлы ике вакыйгага – 2013 елгы җәйге Универсиадага һәм велосипедта дөнья тирәли беренче булып сәяхәт иткән Казанлы Онисим Панкратовның сәяхәте тәмамлануга 100 ел тулу уңаеннан оештырылган иде.

Илдар Халиков веломарафонда катнашучыларны сәламләп, спортчыларның дөньяның 13 илендә булып, 21мең 865км узуларын искә алды.
Сез меңнәрчә километр юл уздыгыз, төрле илләр күрдегез, тулаем алганда веломарафон Татарстан спортчыларының алга кыю бурычлар куеп аларны үтәргә сәләтле икәнен тагын бер кат раслады, диде ул.

ТР Премьер-министры сүзләренчә, бүген Татарстанның спорт төбәге булуы төрле юнәлешләрдә раслана, бу “Ак Барс”, “Рубин”, “КАМАЗ-Мастер” кебек атаклы командаларыбыз гына түгел, бәлки спортның стандарт булмаган төрләре спортчылары да.

Велоузышуда катнашучылар Россиягә һәм бөтен дөньяга бездә шундый уникаль спортчылар булуын күрсәтеп кенә калмады, бәлки велоспорт кебек спорт барын, аның белән бүген актив шөгыльләнергә мөмкинлекләр булуын искә төшерде, дип белдерде Илдар Халиков.

Рафис Борһанов хәбәр иткәнчә, Казан Универсиадасына әзерлекнең соңгы елы гади булмаса да, велосипедчылар командасы финанс ярдәме алган. Ул шулай ук Россия Эчке эшләр министрлыгына безнең спортчыларны сәяхәтләре вакытында озата баруны оештырган өчен рәхмәт белдерде.