Татарстан Премьер-министры Рөстәм Миңнеханов: “Казан Суворов хәрби училищесы – мөһим стратегик объект”

Казан Суворов хәрби училищесы объектларын ремонтлау һәм реконструкцияләү дәвам итәчәк, һәм Татарстан Республикасы Хөкүмәте бу мәсьәләдә һәрьяклы ярдәм күрсәтәчәк.
Бу турыда бүген Казан Суворов хәрби училищесының ремонтланган ашханәсен ачу тантанасында Татарстан Премьер-министры Рөстәм Миңнеханов хәбәр итте.
Чарада Россия Кораллы Көчләр тылы башлыгы – Россия Федерациясе оборона министры урынбасары Владимир Исаков, Татарстан Республикасының беренче вице-премьеры Равил Моратов, Татарстан Республикасы эчке эшләр министры Әсгать Сәфәров, Казан гарнизоны башлыгы Валерий Миронченко, Казан мэры Илсур Метшин һ.б. катнашты.
Татарстан Республикасы Хөкүмәте башлыгы Рөстәм Миңнеханов сүзләренә караганда, ашханәне ремонтлау – республиканың Россия Федерациясе Оборона министрлыгы белән озак вакытлы хезмәттәшлегендә беренче этап кына. Ул ашханәнең реконструкциясен “лаеклы эш” буларак бәяләде. Ашханәдә югары технологияле заманча җиһазлар урнаштырылган, ашау залының мәйданы киңәйтелгән.
Татарстан Республикасы Премьер-министры шулай ук Казан Суворов хәрби училищесының, үзенең төп функцияләреннән тыш, җитди социаль мәсьәләләрне дә чишүен әйтеп китте. Училищеда Татарстан Республикасыннан 68 ятим бала укый, монда барлыгы 100 дән артык ятим бала белем ала.
“Бу республика өчен мөһим стратегик объект, һәм Татарстан Хөкүмәте киләчәктә дә училищега ярдәм итәчәк”, - диде Рөстәм Миңнеханов.
Россия Кораллы Көчләр тылы башлыгы – Россия Федерациясе оборона министрының урынбасары Владимир Исаков тантанада ашханәне ремонтлау буенча эшнең билгеләнгән вакытка төгәлләнүен, шулай ук училище территориясендәге объектларны ремонтлау һәм реконструкцияләү дәвам итәчәген әйтте.
Шуны да искәртик: Казан Суворов хәрби училищесында иске пар казаннары биналарын ремонтлау, хезмәткәрләр өчен эш урыннары, тулай торак төзү күздә тотыла.
Бүгенге көндә Казан Суворов хәрби училищесында 610 яшүсмер, шул исәптән Татарстан Республикасыннан 230 кеше белем ала. Бу уку елында Казан Суворов хәрби училищесына 223 кеше кабул ителде (аларның 118 е – Татарстаннан).