Рөстәм Миңнеханов Казанда яңа “Азино” балалар поликлиникасын ачуда катнашты
Казанда (Глушко ур., 41 а) яңа “Азино” балалар поликлиникасы тантаналы төстә ачылды. Чарада Татарстан Республикасы Президенты Рөстәм Миңнеханов, Татарстан Республикасы Премьер-министры урынбасары – Татарстан Республикасы мәгълүматлаштыру һәм элемтә министры Роман Шәйхетдинов, Татарстан Республикасы сәламәтлек саклау министры Айрат Фәррахов, Казан мэры Илсур Метшин катнашты.
Бу сәламәтлек саклау объекты “ТР ССМның Республика балалар клиник сырхауханәсе” ДАУЗ составына керә һәм Россиядә иң эре балалар поликлиникасының берсе булып тора, мәйданы - 9 794,3 кв. метр, объект хакы – 411,9 млн. сум.
Казан мэры Илсур Метшин, тантанада чыгыш ясап белдергәнчә, “Азино” микрорайонында яшәүчеләр өчен яңа балалар поликлиникасы – иң озак көтелгән вакыйга. Бу 70 мең бала өчен үз вакытында заманча медицина ярдәме алу дигән сүз.
Татарстан Республикасы Президенты Рөстәм Миңнеханов татарстанлыларны бүген бәйрәм ителүче Республика көне белән котлады. Бу көнне без гадәттә социаль объектлар ачабыз, диде ул, әмма безне тәнкыйтьлиләр – чөнки балалар поликлиникасы күптән кирәк иде. Соңгы 10 елда “Азино” микрорайонында яшәүче балалар саны ике ярым мәртәбәгә артты, диде Рөстәм Миңнеханов. Ул ышаныч белдергәнчә, бәләкәй пациентларга югары квалификацияле белгечләр хезмәт күрсәтәчәк, бу поликлиника ТР ССМның Республика балалар клиник сырхауханәсе составына керә.
Яңа бинадан символик ачкыч тантаналы рәвештә Республика балалар клиник сырхауханәсе баш табибе Рафаэл Шәвәлиевка тапшырылды.
Рөстәм Миңнеханов һәм аны озата йөрүче затлар яңа поликлиниканы - холларны, уен модульләре булган көтү зоналарын, “Джунгли” кафесын карап чыктылар. Бинада Wi-Fi аша интернет челтәренә тоташып була.
Поликлиника заманча медицина һәм реабилитация җайланмалары белән җиһазландырылган, дәвалау-диагностика процессы тулысынча мәгълүматлаштырылган.
Татарстан Президенты шулай ук фтизиатрия скринингы кабинетын, участок педиатрлары кабинетларын, УЗИ һәм ФГДС кабинетларын карап чыкты.
4 нче каттагы конференц-залда Татарстан Республикасы сәламәтлек саклау министры Айрат Фәррахов балалар поликлиникасының мөмкинлекләре белән таныштырып чыгыш ясады. Ул хәбәр иткәнчә,Татарстанда барлыгы 730 меңнән артык бала яши, шулардан 197 меңе – Казанда. 2012 елда республикада 55421 бала туган, 2011 ел белән чагыштырганда 5 мең балага артыграк.
Яңа “Азино” балалар поликлиникасында 12 балалар үзәге эшләячәк, шул исәптән кардиоцентр, күзләр тикшерү үзәге, фтизиатрия үзәге һәм башкалар. Моннан тыш кыен тормыш хәлләренә дучар булган балалар өчен әлеге поликлиника базасында аноним рәвештә ярдәм үзәге эшләячәк (бу үзәкне ачуга Россиянең баш педиатры Александр Баранов ярдәм күрсәтте).
“Азино” балалар поликлиникасы зонасында - 11 гомуми белем мәктәбе (11 700 укучы), 22 мәктәпкәчә балалар учреждениесе (6 030 бала).
Айрат Фәррахов Татарстан Республикасы Президентына балалар поликлиникасы белгечләрен торак белән тәэмин итүдә ярдәм күрсәтүен сорап мөрәҗәгать итте.
”Татарстан Республикасында электрон сәламәтлек саклау” проектын Татарстан Республикасы Премьер-министры урынбасары – Татарстан Республикасы мәгълүматлаштыру һәм элемтә министры Роман Шәйхетдинов тәкъдир итте.