Игорь Шуваловка "ТР алдындагы казанышлары өчен" ордены һәм "Казанның мактаулы гражданы" исеме бирелде

Бүген Казан Ратушасында башкаланың һәм республиканың социаль-икътисади үсешенә зур өлеш керткән бертөркем шәхесләрне бүләкләделәр. Аларга Россия һәм Татарстанның дәүләт бүләкләрен ТР Президенты Рөстәм Миңнеханов тапшырды. Бүләкләнүчеләр арасында РФ Премьер-министрының беренче урынбасары, Казандагы 27 нче Бөтендөнья җәйге Универсиадасына әзерлек һәм аны уздыру буенча оештыру комитеты рәисе Игорь Шувалов та бар иде. Аңа Рөстәм Миңнеханов “Татарстан Республикасы каршындагы казанышлары өчен” орденын тапшырды. Россия Хөкүмәте рәисенең беренче урынбасары республиканың әлеге югары дәүләт бүләгенә 2013 елгы Универсиадага әзерлек һәм аны уздыруга керткән зур өлеше өчен лаек булды.
Ә Казан мэры Илсур Метшин Игорь Шуваловка “Казанның мактаулы гражданы”дигән исемгә лаек булуын раслаучы таныклык, диплом һәм тасмага беркетелгән билге тапшырды. РФ Премьер-министрының беренче урынбасары Игорь Шувалов белән РФ спорт министры Виталий Муткога “Казанның мактаулы гражданы” дигән исем бирү турындагы карарны депутатлар шәһәр Думасының быел 19 июльдә узган сессиясендә кабул иткән иде. Аларга әлеге мактаулы исем Казанның социаль-икътисади үсешенә һәм чәчәк атуына, шәһәрнең абруен күтәрүгә, Татарстан башкаласының Россия күләмендә һәм халыкара аренада имиджын күтәрүгә керткән зур өлешләре өчен бирелде. Әлеге исемгә лаек булучылар, белгәнебезчә, бер тапкыр бирелә торган акчалата премия ала, исемнәре “Казанның мактаулы гражданнары” китабына теркәлә.
Бүләкләү тантанасын ачып ТР Президенты быел июль аенда Казанда узган 27 җәйге Бөтендөнья студентлар спорты уеннарының ил өчен дөньякүләм әһәмияттәге зур вакыйга булуын ассызыклап үтте. Аны уздыруда РФ Президенты Владимир Путинның, Игорь Шувалов җитәкләгән оештыру комитетының зур булышлык күрсәтүен ассызыклады. Рөстәм Миңнеханов Универсиаданың Татарстанда спорт үсешенә, сәламәт яшәү рәвеше алып баруга зур этәргеч бирүен искәртте. Казанда яңа спорт инфрастртуктурасы төзелүен, халыкара аэропорт комплексының масштаблы яңартылуын, башкаланың транспорт системасының модернизацияләнүен, интермодаль тармакның сафка басуын, медицина инфраструктурасының зур модернизация узуын һ.б. искә төшереп үтте.
Универсиада Казанны тагын да танытты, аның ярдәмендә Казан эре спорт үзәгенә әйләнде, аның мирасы бүген татарстанлыларга һәм россиялеләргә истәлекле спорт вакыйгаларында катнашу мөмкинлеге бирә, дип Президент 2015 елда Казанда судагы спорт төрләре буенча дөнья беренчелеге, 2018 елда футбол буенча дөнья чемпионаты матчлары узачагын искәртте. Гамәлдәге спорт объектларында казанлыларга килеп шөгыльләнү өчен барлык мөмкинлекләр тулдырылуын белдерде. Рөстәм Миңнеханов Универсиадага әзерлек һәм аны үткәрүдә катнашучыларга рәхмәт белдерде. 5 ел дәвамында Игорь Шувалов җитәкчелегендә эшләгән оештыру комитетына зур дәүләткүләм бурычны хәл итүдәге хезмәтләре өчен аерым рәхмәт сүзләрен ирештерде.
Игорь Шуавлов, үз чиратында, уртак эшчәнлек өчен рәхмәт белдерде. Ул Универсиада уздыру идеясенең Татарстан җирендә тууын ассызыклап, моның өчен республиканың беренче Президенты Минтимер Шәймиевкә зур рәхмәт сүзләрен җиткерде. “Аны бик хөрмәт итәм, укытучым дип саныйм, Татарстан аның җитәкчелегендә Универсиаданы кабул итү хокукын алырлык югары үсешкә иреште”, - дип искәртте ул. Игорь Шувалов Татарстанның бүгенге Президенты Рөстәм Миңнехановны көчле лидер, көчле җитәкче буларак бәяләде. Татарстанның бүген шундый җитәкчесе булу, аның фикеренчә, республика халкының һәм элеккеге зирәк җитәкчелекнең казанышы. Аның белдерүенчә, Миңнехановның әлеге югары постка тәкъдим ителүен хуплап РФ Президенты да зирәклек күрсәткән. “Татарстанда эшләү башка төбәкләргә караганда күпкә җаваплырак”,- дип ассызыклады ул. Шувалов Казан мэрының да талантлы җитәкче булуын ассызыклап, аның адресына җылы сүзләр юллады.
Ул ТР Президенты белән Казан мэрына, башка муниципалитетлар җитәкчеләренә алга таба да ирешкән югары планканы төшермәскә кушты. Үз чиратында кайда гына эшләсә дә Татарстан, Казан белән элемтәләрне югалтмаска ышандырды.
Бүгенге тантанада бертөркем шәхесләргә шулай ук Дуслык ордены, “Ватан алдындагы казанышлары өчен” II дәрәҗә орденының медальләре, “РФ азык индустриясенең атказанган хезмәткәре”, “РФ атказанган машина төзелеше” исемнәре бирелү турындагы күкрәк билгеләре, ТР “Фидакарь хезмәт өчен” медальләре тапшырылды.