Рөстәм Миңнеханов Швейцариянең француз телле өлешенең Сәүдә-сәнәгать палатасы җитәкчесе Ги Меттан җитәкчелегендәге Швейцария бизнес-делегациясе әгъзалары белән очрашты

Россиянең икътисадый яктан алга киткән төбәге буларак, Татарстан Республикасының Швейцария белән хезмәттәшлеге өчен потенциалы зур, һәм бүген гамәлдәге мөнәсәбәтләрне тагын да үстерү бурычы тора. Бу хакта бүген Татарстан Республикасы Президенты Р.Н. Миңнеханов белән очрашуда Швейцариянең француз телле өлешенең Сәүдә-сәнәгать палатасының Россия, Украина, Беларуссия һәм Казахстан өчен җитәкчесе Ги Меттан хәбәр итте.
Исегезгә төшерәбез, Швейцариядән килгән Ги Меттан әфәнде җитәкчелегендәге бизнес-делегация Татарстан Республикасында ике көнлек танышу визиты башкара.
Кунакларны сәламләп, Рөстәм Миңнеханов искә төшергәнчә, визитны әзерләү турында былтыр Татарстан делегациясенең Женевага эш визиты барышында сөйләшенгән иде. Татарстан Республикасы Президенты сүзләренчә,Татарстан икътисады экспортка юнәлешле, һәм Россиянең ВТОга керүе тулаем республика өчен яңа базарлар ача. Швейцария һәрвакыт Татарстан өчен эре сәүдә партнеры булып кала, диде ул, һәм бүген, товар әйләнеше күләмнәре беркадәр кыскаруга карамастан, үзара мөнәсәбәтләрне үстерү мөһим. Рөстәм Миңнеханов хәбәр иткәнчә, республикада Швейцария капиталы катнашында 47 предприятие эшли. Мондый предприятиеләр күбрәк булырга тиеш, диде ул, республика базарында төрле рәвештәге бизнес алып бару мөмкинлеге бар бит.
Татарстан Президенты билгеләп үткәнчә, бүген Швейцария компанияләре “КАМАЗ” ААҖ белән эшли, Түбән Камада пластмассаларны буяу өчен концентратлар белән шөгыльләнүче Швейцария компаниясе эш алып бара, “Дюпон” компаниясе һәм башкалар белән үзара файдалы хезмәттәшлек оештырылган.
Швейцария компанияләре белән хезмәттәшлек алып бару республика өчен кызыклы булган тармаклар арасында Рөстәм Миңнеханов инфраструктур проектларны һәм сәнәгатьне, энергетиканы модернизацияләүне, югары технологияләрне, медицинаны, банк өлкәсен атады.
Швейцариянең француз телле өлешенең Сәүдә-сәнәгать палатасының Россия, Украина, Беларуссия һәм Казахстан өчен җитәкчесе Ги Меттан Рөстәм Миңнехановка әлеге визитны оештырган өчен рәхмәт белдерде. Аның сүзләренчә, Швейцария эшкуарлары вәкилләре Татарстан Республикасының потенциалы белән кызыксыналар, эшлекле контактлар урнаштыруны максат итеп куялар. Ул ассызыклаганча, Швейцария белән Татарстанның хезмәттәшлек өчен потенциалы зур.
Ги Меттан шулай ук Татарстан Республикасының Швейцариядәге сәүдә-икътисад вәкиле Гүзәл Салиховага, Швейцариянең Россиядәге илчелегенә әлеге визитны оештырган өчен рәхмәт белдерде.
Аннары Швейцария бизнес-делегациясе вәкилләре Рөстәм Миңнехановка кыскача гына хезмәттәшлекнең мөмкин юнәлешләре турында сөйләделәр. Бу инновацияләр һәм инвестицияләр, финанс һәм банк эшчәнлеге өлкәсендәге проектлар – сәнәгать предприятиеләре өчен дә, шулай ук хосусый затлар өчен дә медицинада, автомобиль төзелешендә, консалтингта һәм алыш-бирешләрне оештыру өлкәсендә, юриспруденциядә, мәдәнияткә инвестицияләр кертүдә, күргәзмәләр һәм картина галереяләре оештыруда файдалы булачак.