ТР Президенты ТР Мамадыш районында Нократ елгасы аша салынган күпернең икенче чиратын ачты

Тантанада Федераль юл агентлыгы җитәкчесе Роман Старовойт, ТР Президенты Рөстәм Миңнеханов, ТР транспорт һәм юл хуҗалыгы министры Ленар Сафин, “Волго-Вятскуправтодор” идарәсе башлыгы Илдар Минһаҗев, “Волгомост” ААҖ генераль директоры Эдуард Железкин һ.б. катнашты.
Җыелганнар алдында чыгыш ясаганда, Рөстәм Миңнеханов билгеләп үткәнчә, күпер республиканың ике сәнәгать үзәген тоташтырырга мөмкинлек бирәчәк, аларның үсешләре күп очракта М7 юлыннан һәм әлеге күпердән тора. “Илнең үсеше күп очракта инфраструктура мөмкинлегенә, бигрәк тә, юлларга бәйле булачак”, - диде ул.
ТР Президенты проект ясаган, төзегән һәм күперне финанслаган кешеләргә рәхмәт белдерде. “Барысы да күңел салып һәм сыйфатлы эшләнгән”, - дип ассызыклады республика башлыгы.
Рөстәм Миңнеханов аерым рәхмәт сүзләрен Федераль юл агентлыгы (Росавтодор) җитәкчесенә әйтте. “Күперләр – транспорт инфраструктурасының мөһим объектлары. Без аларның әһәмиятен һәм кирәклеген аеруча бүген - Ерак Көнчыгышны су баскан көннәрдә аңлыйбыз”, - диде Роман Старовойт.
Росавтодор җитәкчесе күпернең озак еллар дәвамында хезмәт итүенә өметен белдерде. “Мондый төзелеш сыйфатлы проекттан, югары профессиональ белгечләрдән һәм федераль органнарның җирле хакимиятләр белән тыгыз элемтәсеннән башка мөмкин түгел”, - диде ул һәм проект ясаучыларга, төзүчеләргә рәхмәт белдерде. Роман Старовойт аерым рәхмәт сүзләрен Рөстәм Миңнеханов һәм Ленар Сафин адресына юллады.
Тантаналы сүзләрдән соң, күпер төзелешендә катнашучыларга бүләкләр тапшырылды. ТР “Фидакарь хезмәт өчен” медале белән Роман Старовойт та бүләкләнде.
Моннан тыш, юлчыларны музыкаль бүләк көтте – алар өчен танылган Россия җырчысы Олег Газманов чыгыш ясады. Ул сәхнәгә каскада һәм эшчеләр киемендә чыкты һәм үзенең танылган җырларын, шул исәптән, төзүчеләргә багышланганын башкарды.
Күпернең чыдамлыгын тикшерү өчен, аның аша ТР Президенты җитәкләгән техника колоннасы үтте.
Нократ елгасы аша салынган күпер “Идел” М7 федераль автомобиль юлының бер өлеше булып тора. Ул 1976 нчы елда сафка бастырылган. 2005 нче елда Федераль юл агентлыгы тарафыннан күперне реконструкцияләү карары кабул ителгән.
2011 нче елның сентябрендә объектның беренче чираты сафка бастырылган. Күпернең икенче чираты бик аз вакыт эчендә төзелгән. Аны сафка бастыру 2013 нче елның декабренә планлаштырылган. Росавтодор карамагындагы “Волго-Вятскуправтодор” идарәсе күпернең икенче чиратын төзергә заказ ясаучы буларак чыгыш ясаган. Төзелеш эшләре 2011 нче елның сентябрендә башланган, “Волгомост” ААҖ тарафыннан башкарылган. Корылмалар федераль программа кысаларында реконструкцияләнгән. Күпернең икенче чиратының бәясе - 2,5 млрд. сум.
Яңа күпер - 650,8 м озынлыктагы корылма. Юл категориясе – ике хәрәкәт полосасы белән I-Б.
М7 федераль трассасы – республиканың иң күп автомобильләр йөри торган юлларының берсе, монда көндәлек автомобильләр саны 12 меңнән артып китә. Юлның иң киеренке участогы – Мамадыш районында Нократ елгасы аша чыгу. Күпернең беренче һәм икенче чиратларын сафка бастыру, капма-каршы юнәлешле машиналар агымын икегә бүлеп, вазгыятьне яхшы якка үзгәртергә мөмкинлек бирәчәк.