“Татнефть” 70 еллыгын социаль объектлар төзелеше белән билгеләп үтте

Татарстан нефтенең 70 еллыгы уңаеннан, комплекслы программа кысаларында “Татнефть” ААҖ эшчәнлек алып барган төбәкләрдә 1,2 млрд.сумнан артык акча социаль объектлар төзелешенә, капиталь ремонтына һәм аларны реконструкцияләүгә юнәлдерелгән. Мондый мәгълүмат бүген ТР Хөкүмәте Йортындагы брифингта яңгырады, анда компания генераль директорының кадрлар һәм компаниянең социаль үсеше буенча урынбасары Рөстәм Мөхәммәдиев һәм генераль директорның капиталь төзелеш буенча урынбасары Николай Глазков катнашты.

Әлеге программа бер ел элек ТР Президенты Указы белән расланды. ТР Президенты Рөстәм Миңнеханов рәислегендә оештыру комитеты булдырылды. Аның составына ТР Премьер-министры, ТР Дәүләт Советы Рәисе, “Татнефть” ААҖ генераль директоры керде.

Татарстан нефте тарихының беренче битләре ил өчен катлаулы вакытта – Бөек Ватан сугышы елларында язылган, дип хәбәр итте Рөстәм Мөхәммәдиев.

Ел саен “Татнефть” ААҖ хастаханәләрнең, мәктәпләрнең, балалар бакчаларының, спорт сарайларының, юл чишелешләренең, автопарковкаларның һәм башка социаль объектларның реконструкцияләнүен һәм төзелешен җитәкли. Һәм компания Татарстан нефтенең 70 еллыгында нефтьчеләрнең, төбәк халкының яшәү сыйфатын яхшыртуга юнәлдерелгән бик эш башкарды, дип билгеләп үтте Рөстәм Мөхәммәдиев.

Лениногорскида Шашин урамында 140 урынлы балалар бакчасы ачылган. Шулай ук бу көнне Яңа Шөгер авылында балалар бакчасына һәм Лениногорскида 2 нче номерлы мәктәп бинасы нигезенә таш салынган. Шулай ук шәһәрдә “Теннис Холл” ачылган, аның төзелешенә нефтьчеләр 88,5 млн.сум акча керткән. Танылган тренер Шамил Тарпищев фикеренчә, монда булдырылган шартлар заманча Европа таләпләренә җавап бирә.

Төбәк мәктәпләре дә бүләк алдылар. “Татнефть” генераль директоры Шәфәгать Тәхәветдинов инициативасы буенча, укучыларга 70 млн.сумлык спорт җиһазлары һәм форма бүләк ителгән. Моннан тыш, Баулы, Алабуга, Зәй һәм Чирмешән боз сарайларына яшь хоккейчылар өчен уңайлы яңа автобуслар тапшырылды.

Быел 60 еллыгын билгеләп үткән Әлмәткә аерым игътибар бирелгән. Буа шарлавыгының җиденче чиратын ачу төп бүләкләрнең берсе булган. Ул соңгы 10 ел эчендә төзелгән. “Татнефть” инвестицияләре 400 млн.сумнан артып киткән. Бүген буалар - шәһәр халкының яраткан ял урыны. “Сезне дә безнең Баден-Баден буйлап йөрергә һәм әлеге су-архитектура ансамбленең матурлыгын бәяләргә чакырабыз”, - дип мөрәҗәгать итте Р.Мөхәммәдиев журналистларга.

Медицина өлкәсендә Әлмәт өчен бик күп эш башкарылган. Районның үзәк хастаханәсендә инфекцион авырулар бүлеге ачылган. Шулай ук “Татнефть” психоневрология һәм туберкулезга каршы диспансерларга капиталь ремонт ясауны финанслаган һәм Республика онкодиспансеры филиалын зурайтуга өстәмә 82 млн.сум юнәлдергән. Лениногорскида район Үзәк хастаханәсенең гинекология бүлеге һәм балалар табу йорты, Бөгелмәдә район Үзәк хастаханәсе бинасы ремонтланган.
Әлмәттә “Яшьлек” микрорайонында 1224 укучыга исәпләнгән яңа мәктәп ачылган. “Татнефть” аның төзелешенә 730 млн.сум юнәлдергән.
Брифингта катнашучылар социаль юнәлештәге чаралар, мәдәният һәм спорт өлкәсендәге вакыйгалар турында сөйләделәр.

Юбилейга багышланган төп тантаналар 31 нче августта Әлмәттә уздылар.