Татарстан Хөкүмәте һәм “PricewaterhouseCoopers Russia” компаниясе теләкләр турындагы килешүгә кул куйдылар

Бүген Татарстан Республикасы Министрлар Кабинетында Татарстан Республикасы Хөкүмәте һәм “PricewaterhouseCoopers Russia” компаниясе арасында теләкләр турындагы килешүгә кул куелды.
Документка Татарстан Республикасы Премьер-министры Рөстәм Миңнеханов һәм “PricewaterhouseCoopers Russia” ның генераль директоры, идарә итүче партнеры Петер Герендаши кул куйды.
Журналистларга Герендаши әфәнде хәбәр иткәнчә, килешү, Татарстан Республикасында уңайлы икътисади – иң беренче чиратта, инвестицион – һәм социаль хәл тудыру өчен, үзара файдалы хезмәттәшлек нигезендә партнерлык мөнәсәбәтләрен урнаштыруга юнәлтелгән чаралар комплексын үтәү буенча үзара ярдәм итешүне күздә тота.
Документ, барыннан да элек, республикага инвестицияләр җәлеп итү, Татарстан Республикасының сәнәгый потенциалы һәм андагы производстволар турында дөнья бизнес-ширкәтенең хәбәрдарлык дәрәҗәсен арттыруга юнәлгән. Моннан тыш, Петер Герендаши “PricewaterhouseCoopers” ның сәнәгый компания һәм предприятиеләргә халыкара конференцияләрдә, симпозиумнарда, башка чараларда катнашырга ярдәм итү нияте барлыгын әйтте.
Петер Герендаши сүзләренә караганда, бүгенге көндә Татарстанда “PricewaterhouseCoopers” белән хезмәттәшлек иткән предприятиеләр максималь ачык булып торалар. “Бу компанияләрнең үтә күренмәлелек дәрәҗәсе халыкара базарда күрсәтелгән башка дөньякүләм компанияләрнекеннән түбән түгел”, - диде Герендаши әфәнде.
“PricewaterhouseCoopers” белгечләренең көчләре республика сәнәгый компанияләре вәкилләрен финанс хисап документларының дөньякүләм стандартларга туры килүенә өйрәтүгә, гомумән, финанска кагылышлы грамоталылыкны арттыруга юнәлдерелгән.
Очрашу кысаларында Татарстан Республикасы Премьер-министры Рөстәм Миңнеханов һәм “PricewaterhouseCoopers” ның генераль директоры Петер Герендаши дөнья базарындагы кризислы хәл турында фикер алыштылар.
Татарстан Республикасы Премьер-министры сүзләренә караганда, хәзер барысы да кабул ителгән карарларның оперативлыгы һәм дөреслегеннән торачак. Татарстан Республикасы Хөкүмәте башлыгы республикада финанс кризисының йогынтысы инде сизелүен әйтте: машина төзелеше комплексы предприятиеләренең үсешендә беркадәр акрынаю, кайбер инвестицион программаларны киметү күзгә ташлана. “Боларның барысы республика бюджетын үтәүгә дә йогынты ясарга мөмкин, - дип саный Рөстәм Миңнеханов. – Бүген күп кенә параметрларны яңадан карарга кирәк”.
Бүген кул куелган килешүгә килгәндә, Рөстәм Миңнеханов Татарстан Республикасы Хөкүмәте һәм “PricewaterhouseCoopers Russia” компаниясенең уртак эшенә сорау бар, һәм ул актуаль. Аның сүзләренә караганда, килешү үзара файдалы хезмәттәшлек өчен күбрәк мөмкинлекләр бирәчәк.

Белешмә өчен:

“PricewaterhouseCoopers” компаниясе Россиядә 1989 елдан даими нигездә эшли.
“PricewaterhouseCoopers Russia” бәйсез фирма булып тора һәм “PricewaterhouseCoopers” (PwC) бөтендөнья челтәренә керә. Россиядә 2 меңнән артык хезмәткәр эшли, шуларның 98 % ы – россиялеләр. Фирманың 76 партнерыннан 32 се – россиялеләр.
Татарстанда “PricewaterhouseCoopers” 1995 елдан бирле эшли һәм “Нижнекамскнефтехим” ААҖ нең аудиторы булып тора.
1998 елдан 2002 елга чаклы һәм 2006 елдан хәзерге вакытка кадәр PwC “Татнефть” компаниясенең аудиторы булып тора. PwC “Татнефть” ААҖ нә Нью-Йорк биржасына (NYSE) чыкканда һәм еврооблигацияләр чыгарганда консультацияләр бирде.
2006 елдан PwC – “КАМАЗ” ААҖ аудиторы.
1997 елдан – “Татфондбанк” ААҖ аудиторы.
1998 елдан – “Ак Барс” банкы аудиторы.
2007 елның маенда, Казанга визит белән килгәч, Петер Герендаши ел тәмамланганчы Казанда офис ачылачагы турында әйткән иде.
2007 елның декабре – Казанда PwC офисының рәсми ачылуы.