Казанда ИФО судьялары арасында мини-футбол буенча чемпионат старт алды

Бүген Казанда Идел буе федераль округы судьялары арасында минифутбол буенча VII чемпионат старт алды. Ярышларны ачу тантанасында Татарстан Республикасы Президенты Рөстәм Миңнеханов катнашты.

ИФО судьялары арасында традицион минифутбол турниры уздыру хокукын Татарстан Республикасы судьялар җыелма командасы бер ел элек Уфада узган турнирда яулаган иде. Беренче мәртәбә ярышларда Идел буе федераль округының барлык 14 субъекты командасы катнаша: Башкортостан, Марий Эл, Мордовия, Татарстан, Удмуртия, Чувашия, Пермь крае, Киров, Түбән Новгород, Оренбург, Пенза, Самара, Саратов һәм Ульяновск өлкәләре.

Ярышлар Казанның “Ак Барс” көрәш сараенда һәм “КАИ-Олимп” спорт комплексында узачак. Беренче көнне командалар төркем этабы матчларын уйнаячаклар, ә 21 сентябрьдә чирекфиналлар, ярымфиналлар һәм финал узачак.

Бүген ярышларны ачу тантанасында Татарстан Республикасы Президенты Р.Н. Миңнеханов, Татарстан Республикасы яшьләр эшләре, спорт һәм туризм министры Рафис Борһанов, Татарстан Республикасы Югары суды Рәисе Илгиз Гыйләҗев катнашты. Тантананың мөхтәрәм кунаклары арасында “Рубин” футбол клубының баш тренеры Корбан Бердыев, “Зенит-Казан” волейбол клубы остазы Владимир Алекно, “Зенит” уенчысы Александр Волков та бар иде.

Ярышларны ачу тантанасында чыгыш ясап, Татарстан Республикасы Президенты Рөстәм Миңнеханов турнирда катнашучыларны сәламләде. “Безгә Идел буе федераль округының барлык 14 субъектыннан килгән командаларны үзебездә сәламләү бик күңелле. Ярышларның күптән түгел булып узган Универсиада объектларының берсендә узуы икеләтә күңелле, - дип белдерде Р. Миңнеханов. – Һәм мин судьялар бергәлегенең шундый спорт җанлы һәм дус булуына сөенәм”.

Ул барлык спортчыларга уңышлар һәм кыю көрәш теләде. Ярышларда катнашучыларга сәламләү сүзе белән шулай ук Татарстан Республикасы Югары суды Рәисе Илгиз Гыйләҗев та мөрәҗәгать итте, шуннан соң ярышларны ачык дип белдерделәр. Тупка символик стартны Татарстан җыелма командасы капитаны һәм “Рубин” футбол клубының баш тренеры Корбан Бердыев бирде.