Рөстәм Миңнеханов 2030 елга кадәр Татарстан Республикасын социаль-икътисадый үстерү стратегиясен эшләү мәсьәләләре буенча “Леонтьев үзәге” белгечләре белән фикер алышты

2030 елга кадәр Татарстан Республикасын социаль-икътисадый үстерү стратегиясен эшләү сроклары һәм алымнары турында бүген Татарстан Республикасы Президенты Рөстәм Миңнеханов “Леонтьев үзәге” (Санкт-Петербург) халыкара социаль-икътисадый тикшеренүләр үзәге белгечләре белән очрашуда фикер алышты.
Очрашу “Связьинвестнефтехим”ААҖ киңәшмәләр залында узды, анда “Граждан инициативаларына ярдәм буенча Кудрин фонды” җитәкчесе Алексей Кудрин, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Равиль Зарипов, Татарстан Республикасы икътисад министры Мидхәт Шаһиәхмәтов, Татарстан Республикасы Хезмәт, халыкны эш белән тәэмин итү һәм социаль яклау министры Айрат Шәфигуллин, Татарстан Республикасы транспорт һәм юллар хуҗалыгы министры Ленар Сафин, Татарстан Республикасы төзелеш, архитектура һәм ТКХ министры Ирек Фәйзуллин һәм башкалар катнашты.
Исегезгә төшерәбез, “Леонтьев үзәге” – 1991 елда Санкт-Петербург мэры Анатолий Собчак һәм икътисад буенча Нобель премиясе лауреаты Василий Леонтьев инициативасы буенча нигезләнгән халыкара социаль-икътисадый тикшеренүләр үзәге. Үзәк социаль-икътисадый үсешнең стратегик планнарын, проектларын һәм программаларын эшләгәндә федераль, региональ һәм муниципаль идарә органнарына региональ икътисад һәм иҗтимагый финанслар проблемалары буенча тикшеренүләр оештыру һәм уздыру һәм консультацион хезмәтләр күрсәтү белән шөгыльләнә. Татарстан Республикасында “Леонтьев үзәге” белән хезмәттәшлек турында һәм “2030 елга кадәр Татарстан Республикасын социаль-икътисадый үстерү стратегиясе” проектын эшли башлау турында 2012 елның июлендә Татарстан Республикасы Дәүләт Советының Икътисад, инвестицияләр һәм эшкуарлык комитеты утырышында игълан ителгән иде. Аннары 2012 елның ноябрендә Казанга мәгълүмат җыю һәм “Татарстан авылы” һәм “Транспорт-коммуникация пространствосы” төркемнәрендә эш интервьюсы уздыру өчен “Леонтьев үзәге” экспертлары килгән иде. 2013 елның мартында Рөстәм Миңнехановка “2030 елга кадәр Татарстан Республикасын социаль-икътисадый үстерү стратегиясе” проектының тикшеренү программасы үсеше турында нотык тәкъдим ителгән иде.
Бүгенге очрашуда “Леонтьев үзәге” халыкара социаль-икътисадый тикшеренүләр үзәгенең территориаль стратегик планлаштыру бүлеге җитәкчесе Борис Жихаревич “2030 елга кадәр Татарстан Республикасын социаль-икътисадый үстерү стратегиясе”нең эчтәлеге һәм аны әзерләү графигын тәкъдир итте.
Стратегия 2030ның максаты – республика үсешенең киләчәк юнәлешен билгеләү. Документта мәгариф сыйфаты, кеше капиталын арттыру һәм тотып калу, регионның сәнәгать сәясәте, инновацион һәм инвестицион стратегиясе, пространствода үсеш концепциясе һәм башкалар урын табачак. Документны эшләү өч этаптан торачак. “Стратегия 2030” 2015 елга әзер булыр дип көтелә.
“Леонтьев үзәге” белгечләре Татарстан Республикасының барлык министрлыклары белән тыгыз элемтәдә торачак.
Очрашу барышында Рөстәм Миңнеханов һәм Алексей Кудрин “2030 елга кадәр Татарстан Республикасын социаль-икътисадый үстерү стратегиясе”н киләчәктә эшләү буенча фикер алыштылар.
“Леонтьев үзәге” ХСИТҮ” ЯАҖ генераль директоры Ирина Карелина “Россия регионнарында һәм шәһәрләрендә стратегик планлаштыру” XII бөтенроссия форумы кысаларында (2013 елның 21-22 октябре) Татарстан Республикасының стратегик проектларына багышланган махсус сессия уздырырга тәкъдим итте.