Татарстан Хөкүмәте башлыгы һәм Горький тимер юлы – “Россия тимер юллары” ААҖ филиалы башлыгы Казанның үзәген “Казан” халыкара аэропорты белән тоташтырачак проектны тормышка ашыру турында фикер алыштылар

Бүген Татарстан Республикасы Министрлар Кабинетында узган очрашуда Татарстан Хөкүмәте башлыгы Рөстәм Миңнеханов һәм Горький тимер юлы – “Россия тимер юллары” ААҖ филиалы башлыгы Сергей Козырев Татарстанда транспорт хезмәте күрсәтүне яхшыртуга бәйле кайбер мөһим мәсьәләләр турында фикер алыштылар.
“Россия тимер юллары” ААҖ, аның Горький тимер юлы бүлеге һәм Татарстан Хөкүмәте арасында күптәннән яхшы партнерлык мөнәсәбәтләре булдырылды, - диде очрашу тәмамланганнан соң Сергей Козырев журналистларга. – Узган ел без республикада пассажирларны йөртү һәм йөк ташу буенча катлаулы һәм бай эчтәлекле программа эшләдек, һәм бүген кайбер нәтиҗәләр чыгардык. Безнең бөтен килешүләребез дә үтәлә, программа тормышка ашырыла”.
Очрашу кысаларында Рөстәм Миңнеханов һәм Сергей Козырев Татарстан һәм Россия тимер юллары өчен өстенлекле булган проектлар турында да фикер алыштылар. Бу, барыннан да элек, логистик эшчәнлек белән бәйле йөк ташуларны үстерү, аерым алганда, “Свияжск” станциясе районында мультимодаль логистик комплекс төзү.
Сергей Козырев тукталып узган икенче мөһим мәсьәлә - Казанның үзәген “Казан” халыкара аэропорты белән тоташтырачак проект.
“Бүген без бу бай эчтәлекле проектны тормышка ашыру турында карар кабул иттек”, - диде Сергей Козырев. – Проектны тормышка ашыруның финанс шартлары турындагы сорауга җавап биреп, ул “Россия тимер юллары” ААҖ, Татарстан Хөкүмәте һәм эксплуатант компаниянең финанслауда катнашуы күздә тотылуын әйтте. Моннан тыш, Козырев әфәнде исәпләвенчә, проектны тормышка ашыруга федераль бюджет та кушылып китәчәк.
“Хәзер без проектка техник-икътисади нигезләү үткәрәбез һәм алга таба үзара бәйләнештә тору принципларын әзерлибез, - дип хәбәр итте Сергей Козырев. – Безнең бурычыбыз – шәһәр яны поездларының йөрү графигын аэропорт расписаниесе белән мөмкин кадәр ныграк бәйләү. Электр поездлары җитәрлек тизлек белән йөрер дип уйлыйм. Без пассажирларга хезмәт күрсәтүнең бөтенләй яңача төрен тәкъдим итәргә телибез: очып китүне көтү залы Казандагы вокзал бинасында урнашачак, анда үз рейсыңа теркәлергә, утырту талоны алырга, багажны тапшырырга мөмкин булачак”.
Свияжск мультимодаль логистик комплексы проекты кысаларында тимер юл тармаклары төзелешен тормышка ашыру срокларына килгәндә, Козырев әфәнде фикеренчә, бу якынча 3-4 ел алачак.
Казан үзәген “Казан” халыкара аэропорты белән тоташтырачак тармак турында сөйләгәндә, Горький тимер юлы башлыгы түбәндәгеләрне билгеләп үтте: “Монда ориентирлар билгеләнгән – ул Казан Бөтендөнья җәйге Универсиадасын кабул итәчәк 2013 елда тормышка ашырылачак”.
Татарстан Республикасы Премьер-министры белән очрашу кысаларында башка мәсьәләләр дә, аерым алганда, шәһәрдә транспорт үсеше, Мәскәү белән Казан арасында пассажирлар йөртү һәм йөк ташу күләмнәрен арттыру мәсьәләләре каралды. Сергей Козырев сүзләренә караганда, барлык мәсьәләләрдә дә безнең фикерләребез уртак.