Казанда “Милләт кроссы-2013” Бөтенроссия йөгереш көне узды

Казанда чын гаилә, сәламәтлек һәм спорт бәйрәме – “Милләт кроссы-2013” Бөтенроссия йөгереш көне узды.

Гадәттәгечә гаилә командалары һәм спорт ветераннары йөгереше, VIP-йөгереш һәм массакүләм йөгереш булды. Шулай ук бүген бу спорт бәйрәменә велосипедчылар да кушылды.

“Милләт кроссы”ның рәсми ачылышында ТР яшьләр эшләре, спорт һәм туризм буенча министр Рафис Борһанов, Казан башкарма комитеты җитәкчесе урынбасары Ләйлә Фазлыева, шулай ук ТР Җиңел атлетика федерациясе президенты Хафиз Салихов катнашты. Министр йөгерештә катнашучыларга уңышлар теләде.

VIP-йөгерештә ТР Президенты Аппараты җитәкчесе Әсгать Сәфәров белән бергә ТР Министрлар Кабинеты Аппараты вәкилләре, шәһәрнең район башлыклары, башкарма комитетлар һәм министрлыклар вәкилләре дә катнашты. Финишка беренче булып ТР Министрлар Кабинеты Аппараты җитәкчесе урынбасары Сергей Коростелев килде.

Журналистлар белән аралашканда Әсгать Сәфәров, төп бурыч җиңү түгел, бәлки спорт бәйрәмендә катнашу иде, дип белдерде. “Без бөтен илне берләштергән спорт чарасыннан читтә кала алмыйбыз. Мондый чаралар коллективларны һәм кешеләрне бергә туплый”,-дип ассызыклады ул.

Велосипедчылар узышында ТР юстиция министры Мидхәт Курманов беренче булды, икенче һәм өченче урыннарны ТР Министрлар Кабинеты каршындагы хуҗалык идарәсе директоры Марсель Баһавиев һәм ТР җир асты байлыкларыннан файдалану буенча территориаль агентлык җитәкчесе Равил Мотыйгуллин алды.