Татарстан башкаласына Россиянең эчке эшләр министры Рәшит Нургалиев килде

Бүген Казанга эш визиты белән Россиянең эчке эшләр министры Рәшит Нургалиев килде.
“Казан” халыкара аэропортында армия генералын Татарстан Президенты Минтимер Шәймиев, Татарстан Республикасы буенча эчке эшләр министры Әсгать Сәфәров каршы алды.
Рәшит Нургалиев Татарстан Президенты белән бергә Россия Эчке эшләр министрлыгының Казан юридик институтында (КЮИ) булды. Анда ул КЮИ ның яңа башлыгы – Татарстан Республикасы буенча эчке эшләр министрының элекке урынбасары, милиция полковнигы Фоат Зиннуров белән таныштырды.
Аннары Россия Эчке эшләр министрлыгы башлыгы Россия Федерациясе субъектлары буенча Эчке эшләр министрлыгы, Эчке эшләр баш идарәсе, Эчке эшләр идарәсенең штаб бүлекчәләре башлыклары белән идарә эшчәнлеген камилләштерү буенча Бөтенроссия семинар-киңәшмәсен үткәрде (Татарстан Республикасы буенча Эчке эшләр министрлыгы бинасы, Казан).
Бөтенроссия киңәшмәсе эшендә Россия Эчке эшләр министрлыгының Оештыру-инспекторлык департаменты башлыгы Владислав Волынский, Татарстан Президенты Минтимер Шәймиев, Татарстан Республикасы буенча эчке эшләр министры Әсгать Сәфәров катнашты.
Татарстан Президенты Минтимер Шәймиев киңәшмәдә катнашучыларга тәбрикләү сүзе белән мөрәҗәгать итте. Ул, аерым алганда, соңгы елларда гражданнарның милициягә карата мөнәсәбәтләре яхшы якка үзгәрүен билгеләп үтте. “Хокук тәртибе органнарының сугышка сәләтле бүлекчәләреннән башка, дәүләт тә юк”, - диде Минтимер Шәймиев.
Киңәшмә бетүгә, Россия Эчке эшләр министрлыгы башлыгы Рәшит Нургалиев Яр Чаллыга китеп, анда шәһәрнең эчке эшләр идарәсе хезмәткәрләре өчен торак йортны тапшыру тантанасында катнашачак (“Яшьлек” микрорайоны).
187 милиционер яңа фатирлардан ачкыч алачак. Ел ахырына кадәр барлыгы 327 милиционер гаиләсе өй туе уздырачак.
Яр Чаллыда Россия Эчке эшләр министрлыгы башлыгы Рәшит Нургалиевне Татарстан Премьер-министры Рөстәм Миңнеханов озатып йөриячәк.