Алексей Песошин республика Дәүләт Советы утырышында катнашты
Татарстан Премьер-министры Алексей Песошин республика Дәүләт Советының илле беренче утырышында катнашты. Утырышны Дәүләт Советы Рәисе Фәрит Мөхәммәтшин үткәрде.
Көн тәртибенә 35 мәсьәлә куелды. Аерым алганда, депутатлар дәүләт граждан хезмәте турында республика законына һәм Муниципаль хезмәт турында ТР кодексына үзгәрешләр кертү турындагы закон проектын, шулай ук җирле үзидарә турында, ТР Бюджет кодексының аерым нигезләмәләренең гамәлдә булуын туктатып тору, шәһәр төзелеше эшчәнлеге, гражданнарның торак хокукларын яклауны тәэмин итү турындагы һәм башка закон проектларын карадылар.
Татарстан Республикасы буенча Эчке эшләр министры вазыйфаларын вакытлыча башкаручы Алексей Соколов Дәүләт Советына 2023 елда полиция эшчәнлеге турында хисап мәгълүматын тапшырды. Республиканың эчке эшләр органнары тарафыннан җинаятьләр һәм хокук бозулар турында 859 меңнән артык гариза каралган, 23,5 меңнән артык җинаять тикшерелгән. Банк карталарыннан «дистанцион» урлаулар һәм мошенниклыкларның максималь саны ачыкланган, алардан китерелгән зыян 4,2 млрд сум тәшкил иткән.
ФСБ һәм прокуратура органнары белән берлектә террорчылык характерындагы 58 һәм экстремистик юнәлештәге 24 җинаять ачыкланган. Мигрантлар агымында радикаль идеология тарафдарларының үтеп керү омтылышлары вакытында туктатылган.
Алексей Соколов искә төшергәнчә, бер ел эчендә республикада миграция исәбенә 400 меңгә якын кеше куелган. Шул ук вакытта ул чит ил гражданнары тарафыннан кылынган җинаятьләр республикадагы гомуми криминоген хәлгә сизелерлек йогынты ясамавын билгеләп үтте. Узган ел аларның саны кимегән. Шул исәптән миграция законнарын үтәү буенча контроль-күзәтчелек эшчәнлегенең көчәюе нәтиҗәсендә. Чит ил кешеләре тупланган урыннар буенча 13 меңгә якын тикшерү чарасы үткәрелгән, 20 меңгә якын хокук бозу ачыкланган.
Шулай ук Татарстан Республикасында Кеше хокуклары буенча вәкаләтле вәкил Сәрия Сабурская хисап нотыгы белән чыгыш ясады. Узган ел омбудсмен адресына гражданнарның 5 мең 750 мөрәҗәгате килгән, шуларның 1 мең 621е – ГЛОНАСС +112 системасы аша хәбәрләр. Дәүләт һәм муниципаль хезмәтләрнең бердәм федераль порталының кире элемтә платформасы аша 60 мең 167 хәбәр килгән. «Халык контроле» дәүләт мәгълүмат системасына гражданнардан 104 меңнән артык хәбәр килгән, аларның 80%ы хәл ителгән. "Без барлыгы 87 гражданнарны кабул иттек, шул исәптән 30 уртак кабул итү оештырдык, алар кысаларында 629 граждан кабул ителде, - дип сөйләде Сәрия Сабурская. - Аппарат хезмәткәрләре тарафыннан „Халык контроле“ ТР Дәүләт мәгълүмат системасына хәбәрнамәләр буенча 765 тикшерү чарасы үткәрелде».