Татарстанда капиталь ремонт программасына төзәтмәләр кертелгән

Татарстанда 2013 ел капиталь ремонт программасына төзәтмәләр кертелгән. Бу хакта бүген ТР төзелеш, архитектура һәм торак-коммуналь хуҗалык министры урынбасары Фәрит Хәнифов ТР Хөкүмәт йортында узган атналык киңәшмәдә белдерде. Киңәшмәне ТР Премьер-министры Илдар Халиков үткәрде.

Ф.Хәнифов билгеләп үткәнчә, 13 сентябрьдән башлап “Торак фонд мониторингы” мәгълүмат системасына кереп капиталь ремонт программасына төзәтмәләр кертергә мөмкин. Экономияләнгән акчага өстәмә 19 күп фатирлы йортны ремонтлау планлаштырыла. Йортларның гомуми саны - 842. Программа лимиты 3,3 млн сумга кими һәм 4 млрд 706 млн сум тәшкил итәчәк.

Докладчы сүзләренә караганда, бүген 4 млрд 632 млн сумлык капиталь ремонт эшләре башкарылган, бу еллык лимитның 98 проценты дигән сүз. Дәүләт торак инспекциясе мәгълүматларына караганда, 729 йортта капиталь ремонт эшләре төгәлләнгән. Аларның 367 се Дәүләт торак инспекциясе тарафыннан кабул ителгән, 362 йорт комиссиягә тәкъдим ителгән. 32 муниципаль районда барлык йортларда да капиталь ремонт эшләре төгәлләнгән.