ТР Премьер-министры РФ эчке эшләр министры урынбасары белән округ киңәшмәсендә катнашты

Бүген Чабаксарда РФ Президентының Идел буе федераль округындагы тулы вәкаләтле вәкиле Михаил Бабич һәм Россия эчке эшләр министры урынбасары Михаил Ваничкин уртак киңәшмәдә милләтара конфликтларны кисәтү һәм милли анклавларның күпләп урнашу урыннарында тәртипне тәэмин итү буенча федераль, төбәк һәм муниципаль хакимиятләрнең эшчщнлеге турында фикер алыштылар. Киңәшмә эшендә ТР Премьер-министры Илдар Халиков катнашты.

Киңәшмә барышында Михаил Бабич, Идел буе федераль округында миграцион процессларның милләтара мөнәсбәтләргә тискәре йогынтысын киметүгә юнәлтелгән чаралар комплексын гамәлгә ашырырга кирәк,-дип белдерде. Тулы вәкаләтле вәкил йөкләмәсе буенча, бу тискәре күренешләрнең сәбәпләрен һәм шартларын билгеләү өчен, мобиль мониторинг төркемнәре булдырылган, алар урыннарда милләтара конфликтларны кисәтү буенча дәүләт хакимиятенең барлык структуралары эшчәнлеген бәяләделәр, бу мәсьәләләрне чишү буенча тулы вәкаләтле вәкил аппараты һәм төбәк хакимияте органнарының уртак эшчәнлеге оештырылган.

Киңәшмәдә катнашучылар, бүген федераль, төбәк һәм муниципаль хакимиятләргә, милли нигездә конфликтларны кисәтү өчен, тагын да тыгыз элемтәләр булдырырга һәм системалы чаралар эшләргә кирәк, дип белдерделәр.

Киңәшмә нәтиҗәләре буенча катнашучылар, гражданнарның имин яшәү шартларын тәэмин итү өчен тиешле тәкъдимнәр эшләделәр. Бу – конфликтларны җайга салуның нәтиҗәле механизмнарын булдыру, милләтара мөнәсәбәтләр хәленә системалы мониторинг уздыру, милли һәм дини экстремизмның чагылышларын булдырмау буенча эшне активлаштыру һәм этник принцип буенча формалаштырылган җинаять төркемнәре эшчәнлеген туктату.

Киңәшмәдә катнашучылар шулай ук халык белән профилактик эшләрнең нәтиҗәлелеген арттыру, төбәктә социаль-сәяси тотрыклылыкны саклау чаралары турында фикер алыштылар.