Быелгы көздә 4 меңнән артык Татарстанлы хәрби хезмәткә китәчәк

Бүген илдә хәрби хезмәткә көзге чакырылыш кампаниясе башланды. Барлыгы 150 меңнән артык Россияле, шул исәптән 4 меңнән артык Татарстанлы көзен 1 еллык, ягъни сроклы хезмәткә җибәрелергә тиеш. 1986-1995 елда туган егетләрнең беренче партиясе октябрь ахырында озатыла, соңгылары – декабрь беткәнче.

Аерым алганда, аларның 40 проценты Коры җир гаскәрләренә, 20 проценты Хәрби диңгез флотына, 15 проценты Хәрби Һава көчләре гаскәрләренә, 10 проценты Стратегик билгеләнелешле ракета гаскәрләренә, 6 проценты Һава десанты гаскәрләренә, 2,4 проценты ЭЭМның эчке гаскәрләренә, 1,5 проценты Һава-космик оборона гаскәрләренә, 1 проценты – Оборона министрлыгы идарәсенә озатыла, 15 егет Президент полкына сайлап алына (2010 елдан бирле анда 140 Татарстанлы хезмәт иткән), спортның олимпия төрләре буенча Россия җыелма командаларына кандидат спортчылардан 6сы Санкт-Петербург һәм Самара спорт роталарына, тагын 20се - Мәскәүнең 154 нче комендант полкына (тантаналы чаралар, парадлар уздыруны тәэмин итү өчен анда Татарстаннан быел язын беренче тапкыр җибәрелә башлаган).
Бу көздә 4 төрле хәрби-хисап белгечлеге буенча 1,2 мең Татарстанлы җыеп озатыла. Татарстаннан алынганнарның күпчелеге Көнбатыш, Үзәк һәм Көньяк хәрби округларына озатыла, шулай ук Ерак Көнчыгышка да, әмма су басудан зыян күргән төбәкләрдән егетләр хәрби хезмәткә бу юлы алынмый тора. Ә 12 Татарстанлы альтернатив хезмәткә баруны кулай санаган.

Гомумән алганда, барлыгы 20 меңләп егет чакырылыш комиссиясенә килергә тиеш була. Ә контракт буенча хәрби хезмәткә быел планда Татарстаннан 425 мең егетне җибәрү каралган.

Бүген ТР Министрлар Кабинетында үзәк матбугат чаралары журналистларын җыеп, ТР хәрби комиссары Сергей Николаевич Погодин шулай дип игълан итте.