Татарстан Премьер-министры Алексей Песошин "Закон территориясе» республика конкурсында җиңүчеләрне бүләкләүдә катнашты
Бүген Татарстан Республикасы буенча Эчке эшләр министрлыгында «Закон территориясе» конкурсына йомгак ясалды. Чара ТР буенча ЭЭМ актлар залында (Казан, Дзержинский ур.) узды.
Конкурста җиңүчеләрне бүләкләү тантанасында Татарстан Республикасы Премьер-министры Алексей Песошин катнашты.
Чарада катнашучыларга сәламләү сүзе белән Татарстан Республикасы буенча Эчке эшләр министры полиция генерал-майоры Дамир Садретдинов мөрәҗәгать итте. Ул, аерым алганда, муниципаль берәмлек башлыкларының, предприятие һәм оешма җитәкчеләренең хокук тәртибен тәэмин итүгә, яшүсмерләрне һәм яшьләрне хокукый тәрбияләүгә зур өлеш кертүләрен ассызыклады. Республиканың һәр торак пунктында диярлек хокук тәртибен саклауның җәмәгать пунктлары булдырылган һәм барлык кирәкле әйберләр белән җиһазландырылган, дип билгеләп үтте ТР буенча Эчке эшләр министрлыгы башлыгы. Хокук саклау органнарының ышанычлы ярдәмчеләре муниципаль хезмәткәрләр булды, дип белдерде Дамир Садретдинов.
Җәмәгать тәртибен саклауда халык дружиналары кебек институт катнаша, республика буенча дружиначылар саны 20 меңнән артык кеше. Узган елда алар катнашында 151 җинаять ачылган һәм 3 меңнән артык административ хокук бозу ачыкланган.
«Муниципаль район һәм шәһәр округы территориясендә хокук тәртибен тәэмин итүгә керткән өлеше өчен» номинациясендә җиңүчеләрне котлау һәм бүләкләү өчен Татарстан Республикасы Премьер-министры Алексей Песошин чыкты.
"Мин бүләкләнгәннәрне генә түгел, ә бүген залда булганнарны, шулай ук хокук саклау өлкәсендә эшләүчеләрне дә котларга телим", - диде ул.
Исегезгә төшерәбез, ел саен үткәрелә торган «Закон территориясе» республика конкурсы 2007 елдан бирле үткәрелә. Төп максат - муниципаль районнарның, шәһәр округларының һәм авыл җирлекләренең, предприятие һәм оешма, мәгариф учреждениеләре җитәкчеләренең, җәмәгать тәртибен тәэмин итүгә, яшүсмерләрне һәм яшьләрне хокукый тәрбияләүгә, хокук бозуларны профилактикалауга зур өлеш керткән гражданнарның уңай тәҗрибәсен тарату.
Җиңүчеләр сигез номинациядә билгеләнә: «Авыл җирлеге территориясендә хокук тәртибен тәэмин итүгә керткән өлеше өчен»; «Муниципаль район һәм шәһәр округы территориясендә хокук тәртибен тәэмин итүгә керткән өлеше өчен"; "Хокук саклау эшчәнлегенә ярдәм итүгә керткән өлеше өчен"; "Мәгариф учреждениеләре укучылары арасында хокук бозуларны профилактикалауга керткән өлеше өчен"; "Үсеп килүче буынны тәрбияләүгә, яшьләрдә һәм яшүсмерләрдә җәмгыятьнең хокукый нигезләренә хөрмәт формалаштыруга керткән өлеше өчен"; "Шәхси сак предприятиеләрен җәлеп итеп җәмәгать тәртибен саклауга керткән өлеше"; "Җәмәгатьчелекне җәлеп итеп җәмәгать тәртибен саклауга керткән өлеше өчен"; "Балигъ булмаганнарны җәмәгать тәрбиясенә керткән өлеше өчен".