Илдар Халиков: “Татарстанның PricewaterhouseCoopers белән хезмәттәшлек итүе өчен потенциал зур”

PricewaterhouseCoopers компаниясе берничә проект буенча Татарстанның элеккеге һәм ышанычлы партнеры булып тора, әмма хезмәттәшлек потенциалы әле тулысынча гамәлгә ашырылмаган. Мондый фикерне бүген ТР Премьер-министр Илдар Халиков Россиядә PwC идарәче партнеры Дэвид Грей белән очрашу барышында белдерде. Очрашуда шулай ук вице-премьер – ТР мәгълүматлаштыру һәм элемтә министры Роман Шәйхетдинов, Универсиада Дирекциясе җитәкчесе Владимир Леонов, КФУның икътисади һәм стратегик үсеше буенча проректоры Марат Сәфиуллин катнашты.

Очрашуны ачканда, Татарстан Хөкүмәте башлыгы PricewaterhouseCoopers ны Универсиаданың уңышлы тәмамлануы белән котлады.. “Без башка өлкәләрдә дә хезмәттәшлек итәбез, - диде Илдар Халиков. – Аеруча шатландырганы, КФУ белән хезмәттәшлек турында безнең тәкъдимне кабул итүегез ”.

“Шул ук вактыта мин безнең хезмәттәшлекнең потенциалы ахыргача гамәлгә ашырылмаган, дип саныйм. Татарстан сезнең бизнес өчен зур мәйдан булып тора”,-дип белдерде Илдар Халиков.

ТР Премьер-министры, Kazansummit’13 форумы кысаларында PwC үзе өчен яңа проектлар табар, шул исәптән Иннополис һәм “Смарт Сити ” проектлары кысаларында да, дигән ышанычын белдерде.

Илдар Халиков, хәйрия эшчәнлеге, балаларга һәм өлкәннәргә ярдәм итүләре өчен, PricewaterhouseCoopers компаниясенә рәхмәтен белдерде.

Дэвид Грей хәбәр иткәнчә, компаниянең Татарстан белән хезмәттәшлекне үстерүгә зур планнары бар. Кыш көне Казанда PwC офисында эшләүчеләр саны 200 кешегә җитәчәк, ул күләме буенча Мәскәүдән соң икенче булачак. Казанга Мәскәүдән кайбер федераль функцияләр күчереләчәк.

PwC җитәкчеләре сүзләренчә, Казанның өстенлекләренең берсе – шәһәрдә кирәкле күләмдә квалификацияле хезмәткәрләр табып була. Быел PwC Татарстан вузларын тәмамлаган 40-50ләп белгечне студент эскәмиясеннән үк эшкә алырга планлаштыра.

Очрашу тәмамланганда анда катнашучылар PricewaterhouseCoopers компаниясенең Татарстанда киләчәктә дә уңышлы эшчәнлегенә ышаныч белдерделәр.