Константин Цицин:”Татарстан – 185 нче федераль законны гамәлгә ашыруда Россия төбәкләре арасында иң алдынгыларның берсе”

Татарстан Республикасы “Торак-коммуналь хуҗалыгын реформалаштыруга ярдәм итү фонды турында”гы 185 нче федераль законны гамәлгә ашыруда Россиядә иң яхшы тәҗрибәне күрсәтә. Мондый фикерне бүген Фондның генераль директоры ТР Төзелеш, архитектура һәм торак-коммуналь хуҗалыгы министрлыгы коллегиясенең киңәйтелгән утырышында җиткерде. Утырышны Татарстан Премьер-министры Илдар Халиков уздырды.

Үзенең чыгышында Илдар Халиков Фондка һәм аның җитәкчесенә рәхмәт белдерде. Аның сүзләренчә, күп фатирлы торак йортларга ремонт ясау зур икътисади һәм социаль нәтиҗә бирде.

ТР төзелеш, архитектура һәм торак-коммуналь хуҗалык министры Ирек Фәйзуллин үзенең докладында, Фондның эшләү чорында Татарстан аннан 11,423 млрд сум алды, дип белдерде. Бу вакыт эчендә 10933 торак йортка капиталь ремонт ясалган.
Хәзерге вакытта, министр сәзләренчә, республика Фонд белән бергә авария хәлендәге тораклардан күчерү программасының яңа этабын башлый.
Ирек Фәйзуллин хәбәр иткәнчә, 2013 елда Татарстанда торак фондны һәм коммуналь инфраструктураны яңартуга тотылган акчаның гомуми күләме 9,4 млрд сум тәшкил иткән. Программа буенча 234 мең кеше яши торган 823 торак йорт ремонтланган.

Фондның генераль директоры Константин Цицин үзенең чыгышында Татарстанны 185 нче федераль законны гамәлгә ашыруда Россия төбәкләре арасында иң алдынгыларның берсе, дип атады. “ Мондый тәҗрибә безнең илдә күп түгел. Бөтен Россия буенча проблемалар бер төсле, Ләкин Татарстанда аны хәл итә алалар, ә кайбер башка төбәкләрдә юк”.
Константин Цицин үзенең чыгышын йомгаклап, Илдар Халиковка республика өчен 2014 ел программасына каралган акчаның Татарстанга килүе турындагы түләү документын тапшырды.

Коллегия утырышы тәмамланганда Илдар Халиков, Фонд белән Татарстанның киләчәктә дә уртак, нәтиҗәле эшләвенә ышаныч белдерде.