Илдар Халиков Рус география җәмгыятенең Татарстандагы бүлеге попечительләр советы утырышын уздырды

Бүген ТР Хөкүмәте Йортында Татарстан Республикасы Премьер-министры Илдар Халиков Рус география җәмгыятенең Татарстандагы бүлеге попечительләр советы утырышын уздырды.

Рус география җәмгыяте – Россиянең борынгы иҗтимагый оешмасы, дөньяның борынгы география җәмгыятьләренең берсе. Аның төп бурычы – дөрес географик мәгълүматларны җыю һәм тарату. Рус география җәмгыятенең экспедицияләре Себер, Ерак Көнчыгыш, Урта һәм Үзәк Азияне, Дөнья океанын үзләштерүдә, яңа җирләрне ачу һәм өйрәнүдә зур роль уйный. 1956 елдан Рус география җәмгыяте Халыкара география берлегенә керә.

Рус география җәмгыятенең попечительләр советын Россия Президенты Владимир Путин җитәкли, Рус география җәмгыяте рәисе – РФ оборона министры Сергей Шойгу.

Рус география җәмгыятенең Татарстандагы бүлеге 2010 елның 5 апрелендә үзенең эшчәнлеген яңадан башлый. Аның Татарстандагы бүлеге рәисе - Дмитрий Шиллер, ул бүлекне 2010 нчы елның апрелендә җитәкли башлаган.

Татарстан бүлегенең попечительләр советы утырышын ачканда, ТР Премьер-министры Илдар Халиков, совет үзе ТР Президенты Рөстәм Миңнеханов тәкъдиме буенча булдырылды һәм ул Рус география җәмгыяте алдында торган мәсьәләләрне чишүдә бизнес-структураларның, дәүләт хакимияте органнарының, Рус география җәмгыяте әгъзаларының көчләрен берләштерүгә юнәлтелгән, дип искә төшерде.

Татарстанда, И.Халиков сүзләренчә, Рус география җәмгыяте төбәк бүлегенең 242 рәсми әгъзасы теркәлгән, шул исәптән - 163 Казан, 38 – Яр Чаллы, 12 – Чистай кешеләре.

“Рус география җәмгыяте Россиянең төрле почмагында кырларда гамәли тикшеренүләр, экспедицияләр алып бара, һәм бу эшчәнлекне дәвам итәргә кирәк”, - дип ассызыклады Илдар Халиков.
Рус география җәмгыятенең Татарстандагы бүлеге эшчәнлеге һәм киләчәктәге эшчәнлеге перспективалары турында аның җитәкчесе Дмитрий Шиллер доклад ясады.