КФУ һәм Agilent Казанда уртак лаборатория ачты

Бүген Казан федераль университетының Физика институтында автоматлаштырылган проектлау системаларының уртак лабораториясе - “КФУ-Аджилент” үзәге ачылды. Тантаналы ачылышта ТР Премьер-министры Илдар Халиков катнашты.

КФУ белән Agilent компаниясенең хезмәттәшлеге турында меморандум быелгы елның апрелендә имзаланган иде, ә бүген лаборатория үзенең ишекләрен ачты. Лаборатория Физика иститутының радиофизика кафедрасында урнашкан. Лабораторияне җиһазлау өчен Agilent, компания вәкилләренең сүзләренчә, берничә миллион доллар акча тоткан.

Радиофизика кафедрасы җитәкчесе Олег Шерстюков сүзләренчә, лабораториядә студентлар тикшеренү барышында автоматлаштырылган проектлау системалары белән эшләргә өйрәнәчәк, әмма физика буенча гына түгел, ә дисциплинара фәннәр буенча да, лабораториядә СВЧ-нурланышны файдаланып югары төгәллекле тикшеренүләр уздырып, махсус җиһазлар эшләп булачак. Физика институты лаборатория базасында студентларны укытып кына калмый, бәлки радиоэлектроника сәнәгате предприятиеләре ихтыяҗлары буенча кадрларны яңадан әзерләү программаларын да гамәлгә ашырачак.

Татарстан Премьер-министры Илдар Халиков - “Мин үзем бик прагматик кеше, шулай да җитештерү тармагы белән бәйләнешле мәгариф проектлары булуы һәрвакыт куандыра. Физика институтына, радиофизика кафедрасына бу яктан җиңелрәк, чөнки сезнең партнерыгыз “Радиоэлектрон технологияләр” концерны, ә ул заказларга күмелгән һәм квалификацияле хезмәткәрләргә мохтаҗ”, - дип белдерде.

Дәрәҗәле кунакларга яңа лабораториянең мөмкинлекләрен күрсәттеләр, кафедра хезмәткәрләре лаборатория җиһазларын төрле өлкәләрдә – медицина, авыл хуҗалыгы һәм нефть чыгаруда куллануга мисаллар китерделәр.