Премьер-министр Рөстәм Миңнеханов җитәкчелегендәге Татарстан Республикасы делегациясе Төркмәнстанның Бәйсезлек көнен бәйрәм итүдә катнаша

Бүген Татарстан Республикасы Премьер-министры Рөстәм Миңнеханов Төркмәнстан Президенты Гурбангулы Бердымухаметовка Татарстан Республикасы Президенты Минтимер Шәймиев исеменнән котлау тапшырды.
Шуны да искәртик: Рөстәм Миңнеханов җитәкчелегендәге Татарстан Республикасы делегациясе бүген Төркмәнстан башкаласы Ашхабадта. Анда даими рәвештә нейтраль Төркмәнстанның дәүләти бәйсезлегенә 17 ел тулу уңаеннан тантаналы чаралар уза.
27 нче октябрь иртәсендә Төркмәнстанның азатлыгы һәм бәйсезлеге өчен көрәшкән кешеләр истәлегенә Бәйсезлек монументына чәчәкләр куелды.
Аннары Төркмәнстан Президенты Гурбангулы Бердымухаметов Татарстан Республикасы Премьер-министры Рөстәм Миңнеханов белән сөйләшүләр алып барды (Төркмәнстанның Президент Сарае комплексы бинасында). Рөстәм Миңнеханов Гурбангулы Бердымухаметов әфәндегә, Төркмәнстанның Бәйсезлек көне уңаеннан, Татарстан Президенты Минтимер Шәймиевтән котлау тапшырды.
Төркмәнстан Президенты Гурбангулы Бердымухаметов дусларча мөнәсәбәтле Татарстан Республикасы турында җылы сүзләр әйтте, республикаларның хезмәттәшлеге дәвам итәчәген, шулай ук тугандаш халыклар арасындагы мөнәсәбәтләрнең аның өчен бик кадерле булуын билгеләп узды.
Тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов хәбәр иткәнчә, бүген кичен Татарстан делегациясе, Төркмәнстанның дәүләти бәйсезлегенә 17 ел тулуны бәйрәм итү уңаеннан, рәсми кабул итүдә катнашачак.
Көндез шулай ук бәйрәм кысаларында хәрби парад булачак. Анда заманча хәрби техниканың яңа төрләре күрсәтеләчәк.
Тантаналы чаралар бәйрәм салюты белән тәмамланачак.
Иртәгә программада – “Төркмәнатлары” дәүләти берләшмәсенең яңа бинасын тантаналы ачу, аннары “Төркмәнатлары” берләшмәсенең дәүләти ипподромында бәйрәм уңаеннан ат чабышлары узачак.
28 нче октябрьдә кичен Татарстан Республикасы делегациясе Төркмәнстаннан китәчәк.
Делегация составында – “Татнефть” ААҖ нең генераль директоры Шәфәгать Тәхаветдинов, “КАМАЗ” ААҖ нең генераль директоры Сергей Когогин, тышкы икътисади эшчәнлек буенча Татарстан Республикасы Премьер-министры ярдәмчесе Искәндәр Мөфлиханов.