Казанда полиция һәм янгын сүндерү хезмәткәрләре арасында дөнья чемпионнарын хөрмәтләделәр

Бүген Казанда полиция һәм янгын сүндерүчеләр арасында Бөтендөнья уеннарында җиңү яулаган ТР Эчке эшләр министрлыгының хоккей һәм волейбол командаларын хөрмәтләделәр. Татарстан Премьер-министры Илдар Халиков аларны җиңүләре белән котлады. Тантаналы чарада РФ Эчке эшләр министрлыгының җәмәгатьчелек тәртибен саклау һәм РФ субъектларының башкарма хакимияте органы белән үзара бәйләнешләрне координацияләү буенча баш идарәсе җитәкчесе Юрий Демидов, ТР буенча эчке эшләр министры Артем Хохорин, Татарстан Республикасы буенча баш федераль инспектор Ренат Тимерҗанов катнашты.

Полиция һәм янгын сүндерү хезмәткәрләре арасында XV Бөтендөнья уеннары 2013 елның августында Төньяк Ирландиянең Белфаст шәһәрендә узды. Бу хокук тәртибе органнары һәм янгын сүндерү хезмәткәрләре командалары өчен Олимпия уеннарына үзенчәлекле охшаш уен. Быел бөтен дөньядан 10 меңнән артык катнашучы спортның 57 төре буенча ярышты. Волейбол һәм хоккей буенча Татарстаннан “Динамо-ЭЭМ” командалары чыгыш ясады. Нәтиҗәдә ике команда да үзләренең титулларын исбатладылар.

Бүген Татарстан Премьер-министры Илдар Халиков чемпионнарны сәламләп, “Мондый җиңүләр очраклы гына бирелми, алар еллар дәвамында көч куеп ирешелә”, - дип белдерде. Ул “Динамо” физкультура-спорт җәмгыятенең ролен билгеләп үтте һәм ТР Президенты Аппараты җитәкчесе Әсгать Сәфәровка республикада динамо хәрәкәте үсешенә зур өлеш керткәне өчен рәхмәт белдерде. ТР Премьер-министры тренерларга һәм спортчыларга җиңәргә ярдәм итүчеләрнең барысына да аерым рәхмәт әйтте.

Илдар Халиков Татарстан Президенты исеменнән чемпионнарны котлады, җиңү өчен рәхмәт белдерде һәм ТР Президенты Рәхмәт хатларын тапшырды.