Илдар Халиков: “Универсиада чорында туристларның Татарстанга карата үскән кызыксынуын сакларга кирәк”

Татарстанга туристларның Казанда 2013елгы Бөтендөнья җәйге Универсиада чорында үскән кызыксынуларын сакларга кирәк. Бу хакта бүген ТР Премьер-министры Илдар Халиков “Киләчәк юнәлешләре” II Казан халыкара туристлык форумында хәбәр итте.
Форум 17-19 октябрьдә Казанда уза.

Илдар Халиков, форумда катнашучыларны Татарстан Хөкүмәте һәм Президенты исеменнән сәламләп, туристлык республика өчен күпкырлы төшенчәгә ия, бу үзеңне дөньяга таныту, мөстәкыйль бизнес структурасы буларак туристлык юнәлешен үстерү мөмкинлекләре дә, - дип белдерде.

Ул соңгы дүрт елда Татарстанның беренче Президенты,ТР Дәүләт Киңәшчесе Минтимер Шәймиев инициативасы белән төбәктә туристлык үсешенә, тарихи һәм архитектура һәйкәлләрен яңадан торгызуга күп акча тотылуын искә төшерде. Без туристлар ташкынының артуын күрәбез, ләкин әле көтелгән һәм теләгән күрсәткечләрдән ерак торабыз, диде.

Илдар Халиков Казанда узган Бөтендөнья җәйгеУниверсиаданың да туристлык үсешенә уңай йогынты ясавын билгеләп, Универсиада чорында Казанда дөньяның 170 иленнән 150 меңнән артык турист булып китүен хәбәр итте.

Туристлык буенча федераль агентлык җитәкчесе урынбасары Дмитрий Амунц, форумда катнашучылар алдында ясаган кыскача чыгышында, тармак өчен хезмәткәрләр әзерләү, туристик хезмәтләрнең сыйфатын арттыру буенча эш алып барылуын белдерде. Яңа отельләр төзелеше, инфраструктура, транспорт челтәрен камилләштерү – болар барысы да туристлар ташкынын тәэмин итә.

Дмитрий Амунц хәбәр иткәнчә, 2014 нче елның мартында “Интурмаркет” күргәзмәсе кысаларында туристлык өлкәсендә яңа технологияләр һәм алымнар эшләүгә багышланган семинар узачак.

Моннан тыш, аның сүзләренчә, ел азагына кадәр Туристлык буенча федераль агентлык һәм Татарстан Республикасы арасында яңа технологияләрне эшләтү буенча Татарстанны пилот мәйданчык буларак тәкъдим итүче килешү төзеләчәк.

Бу килешү кысаларында 14 яшькә кадәрге балалар өчен балалар ял лагерьләрен булдыручы “Страна детей” проекты гамәлгә кертеләчәк. Калининградтан Владивостокка кадәр, шул исәптән Татарстан территориясендә дә 24 мәйданчык булдырылачак.