Дмитрий Рогозин Татарстанның сәнәгать предприятиеләрендә булды

Бүген Казанда РФ Хөкүмәте каршындагы Хәрби сәнәгать комиссиясе утырышын уздыру кысаларында, комиссия әгъзалары Татарстан предприятиеләрендә һәм һөнәри белем бирү учреждениеләрендә булдылар. Делегация составында РФ Хөкүмәте вице-премьеры Дмитрий Рогозин, Беларусь Республикасының беренче вице-премьеры Сергей Семашко бар, аларны Татарстан Премьер-министры Илдар Халиков, ТР вице-премьеры – сәүдә һәм сәнәгать министры Равил Зарипов озата йөрделәр.

Делегация беренче булып “КАПО-Композит” заводында булды. Бу уртак предприятие Берләшкән авиатөзелеш корпорациясе программасы кысаларында булдырылган. Заводны оештыруга кергән инвестицияләрнең күләме 3,5 млрд сум тәшкил иткән. Делегация әгъзаларына заводны, шулай ук композит материаллардан әзер эшләнмәрне күрсәттеләр.

Дмитрий Рогозинга Горбунов исемендәге Казан авиация-җитештерү берләшмәсенең укыту-производство үзәге территориясенә урнашкан “КАИ-лазер” инжиниринг үзәге тәкъдир ителде. КНИТУ-КАИ ректоры Альберт Гыйльметдинов производствода лазер куллануның өстенлекләре турында сөйләде. IPG Photonics компаниясенең яңа лазер станокларын һәм тулысынча лазер ярдәмендә эшкәртелгән әзер эшләнмәләрнең үрнәкләрен күрсәттеләр.

Яшел Үзәндә Дмитрий Рогозин Горький исемендәге завод эшчеләре өчен төзеләчәк торак йортка нигез салуда катнашты.
Аннан соң, Горький исемендәге заводның уку-укыту үзәгендә булдылар. Кунаклар заманча җиһазландырылган уку классларын карадылар, укучылар белән аралаштылар.

Татарстан Премьер-министры Илдар Халиков республика сәнәгате өчен булган оборона заказлары өчен Дмитрий Рогозинга рәхмәт белдерде.