Дмитрий Рогозин Казанда Оборона-сәнәгать комплексы оешмаларын кадрлар белән тәэмин итү мәсьәләсе буенча РФ Хөкүмәте каршындагы Хәрби-сәнәгать комиссиясе утырышын уздырды

Әзерлекле кадрлар булмаса бернинди станоклар да, бернинди җайланмалар да эшләмәячәк. Бу хакта бүген Россия Хөкүмәте рәисе урынбасары, Россия Хөкүмәте каршындагы Хәрби-сәнәгать комиссиясе рәисе Дмитрий Рогозин, Россия Хөкүмәте каршындагы Хәрби-сәнәгать комиссиясе утырышында белдерде.
Утырыш “Казан вертолет заводы” ААҖ территориясендә узды.

“Кадрлар проблемасы оборона-сәнәгать комплексында бик кискен тора”,-дип белдерде Дмитрий Рогозин.Аның сүзләренчә, кадрларның олыгаюы, бу тармакта эш хакының түбән булуы, торак мәсьәләсен хәл итүдә перспективаларның булмавы проблеманы катлауландыра.

Дмитрий Рогозин хәбәр иткәнчә, “2014-2020 елларда оборона-сәнәгать комплексы оешмалары өчен квалификацияле кадрларны әзерләү һәм яңадан әзерләү” дигән дәүләт программасын агымдагы ел ахырына кадәр кабул итү планлаштырыла. Программаның проекты РФ Фән һәм мәгариф министрлыгы тарафыннан әзерләнгән.

Дмитрий Рогозин шулай ук бүген Горький исемендәге Яшел Үзән заводы эшчеләре өчен төзеләчәк торак йортның нигезенә беренче ташны салуда катнашуын белдерде.

Хәрби-сәнәгать комиссиясе утырышын Татарстанда уздыруыбыз очраклы түгел, монда күп нәрсәгә өйрәнергә мөмкин, диде ул.

Моннан тыш, Дмитрий Рогозин хәбәр иткәнчә, 2014 елның язында Казанда оборона-сәнәгать комплексының директорлар корпусы катнашында сакчыл производство мәсьәләләре буенча киңәшмә уздыру планлаштырыла.