Татарстанда яңа гипс плитәләр җитештерелә башлады

Бүген Татарстанның Кама Тамагы районында “Фоника-Гипс” заводында гипс плитәләр җитештерү буенча линия эшли башлады. Бу тантаналы чарада ТР Премьер-министры Илдар Халиков катнашты.

Торак биналарда бүлмәләрне бүлү өчен билгеләнгән гипс плитәләр эшләп чыгару буенча яңа линия, “Фоника-Гипс” заводы үсешенең чираттагы этабы булды, ул үзенең эшен 2013 елның июнендә башлаган иде. Чит ил җиһазларында, завод янында чыгарыла торган югары сыйфатлы гипстан ел саен 300 мең квадрат метр плитә җитештереләчәк.

Татарстан Премьер-министры Илдар Халиков яңа линия ачылу тантанасында чыгыш ясап, “Фоника-Гипс” заводы Татарстанда очраклы барлыкка килмәде, дип белдерде. “Бездә төзелеш зур мәйданда бара, Универсиада тәмамланса да, республикада төзелеш кимемәде”,-диде ул.
“Ә республика һәм район җитәкчелеге өчен бу яңа эш урыннары, бу производство күп еллар кешеләргә эш хакы бирергә мөмкинлек бирәчәк”,-дип ассызыклады Илдар Халиков.

“Фоника” уртак предприятиесенең Директорлар Советы рәисе Александр Забарский үз чиратында предприятиене булдыруда ярдәме өчен Татарстан җитәкчелегенә рәхмәт белдерде.

Дәрәҗәле кунаклар яңа линиянең эшли башлавын белдереп, символик тасманы кистеләр һәм предприятие буйлап экскурсиядә булдылар.