Татарстан Республикасында шикәр чөгендереннән көтелгән уңыш 2 млн. тонна тәшкил итәчәк

Татарстан Республикасында шикәр чөгендере 48,7мең гектар мәйданда җыелган, бу гомуми күләмнең 88% ын тәшкил итә. Шикәр чөгендеренең тулай җыемы бүгенге көнгә 1,810 млн. тонна, уртача уңыш – гектарыннан 372 ц. Бу хакта бүген ТР Хөкүмәте Йортында узган республика киңәшмәсендә ТР авыл хуҗалыгы һәм азык-төлек министрының беренче урынбасары Минсәгыйрь Нуретдинов хәбәр итте.

Киңәшмә Татарстанның барлык муниципаль районнары белән видеоконференцэлемтә режимында үтте, аны Татарстан Республикасы Премьер-министры Илдар Халиков уздырды.

Минсәгыйрь Нуретдинов сүзләренчә, шикәр чөгендереннән көтелгән уңыш 2 млн. тонна тәшкил итәчәк. Узган атнада 7,6 мең гектарда җыелды, тагын 6,5 мең гектар мәйданда җыясы калды.

Уңайлы һава шартлары булганда, шикәр чөгендерен җыю киләсе атнада төгәлләнер дип көтелә. Җыелган 1,8 млн. тоннаның якынча 1 млн. тоннасы кырлардан кайтарылган, 510 мең тоннасы эшкәртелгән (Буа,Зәй,Норлат шикәр заводларында).

Татарстан Республикасында туфракны төп эшкәртү 1690 мең гектар мәйданда башкарылган, бу 78% тәшкил итә, дип белдерде Минсәгыйрь Нуретдинов.