Татарстанның беренче вице-премьеры Борис Павлов “Россия төбәкләренә инвестицияләр” саммитында Татарстанның инвестицион мөмкинлекләрен тәкъдим итте

Кичә, 11 нче ноябрьдә, Татарстан Республикасы Премьер-министрының беренче урынбасары Борис Павлов “Россия төбәкләренә инвестицияләр” икенче халыкара саммитында (Мәскәү, “Мариотт Гранд Отель”) катнашты.
Саммитта катнашучылар алдында чыгыш ясап, Борис Павлов Татарстанның инвестицион мөмкинлекләрен тәкъдим итте һәм сәнәгать өлкәләрендә Россия инвесторларын гына түгел, чит илнекеләрен дә җәлеп иттерә һәм гамәлгә ашырылдыра торган республика өстенлекле инвестицион һәм инновацион проектлары турында сөйләде.
Борис Павловның доклады һәм Татарстан Республикасының күргәзмә экспозициясе кайбер потенциаль инвесторларда (Европа реконструкция һәм үсеш банкы, ГПБ “Газпромбанк” ААҖ, “Төбәк сәясәте институты”, “Милли конкурентлыкка сәләтлелек советы”, Транспортчы һәм эшмәкәрләр союзы һ.б.) зур кызыксыну уятты.
Конференция программасында – башкала чигеннән читтә булган коммерция мөмкинлекләре; зур алдынгы индустрия компанияләренең төбәк филиалларын булдыру, аларга ярдәм итү һәм үстерү мәсьәләләре, салымнар һәм законнар; җирле халыкның сатып алу мөмкинлекләренә анализ; җирле бизнеска ярдәм итү һәм бизнесның җирле хакимиятләр белән үзара бәйләнешен үстерү нюанслары кебек мәсьәләләр турында фикер алышу.
Саммит төбәк инвесторлары һәм предприятиеләре арасындагы бәйләнешләрне ныгытырга, милли проектлар һәм дәүләти инвестицион программаларны тормышка ашыруга юнәлтелгән инвестицион процессларны активлаштырырга мөмкинлек бирер дип көтелә.
Шуны да искәртик: саммит кысаларында Россия Федерациясе Федераль Җыелышының Федерация Советы, Төбәк банклары ассоциациясе, Россия Сәнәгатьче һәм эшмәкәрләр союзы, Россия Федерациясе Сәүдә-икътисад палатасы ярдәме белән “Россия төбәкләренең инвестицион мөмкинлекләре” халыкара күргәзмәсе уза. Конверенция һәм күргәзмә 13 нче ноябрьгә кадәр барачак.
Конференциядә доклад белән Россия Федерациясе икътисади үсеш министры киңәшчесе Сергей Беляков, Калуга өлкәсе администрациясенең беренче вице-губернаторы Максим Акимов, компанияләрнең башка топ-менеджерлары һәм төбәк администрацияләре вәкилләре чыгыш ясады.