Татарстан Хөкүмәте һәм Татарстан Республикасы предприятиеләре һәм эшмәкәрләре ассоциациясе, дөньякүләм икътисади кризис шартларында эшләү өчен, көчләрен берләштерә

Бүген Татарстан Премьер-министры Рөстәм Миңнеханов җитәкчелегендә узган киңәшмәдә Татарстан Республикасы предприятиеләре һәм эшмәкәрләре ассоциациясе әгъзалары, зур предприятие җитәкчеләре, кайбер муниципаль берәмлек башлыклары, Татарстан Республикасы башкарма комитетының республика һәм территориаль федераль органнары, финанс оешмалары вәкилләре дөньякүләм икътисади кризис шартларында Татарстан Республикасы сәнәгый предприятиеләренең эше турында фикер алыштылар.
Киңәшмә “Казанкомпрессормаш” ААҖ нең конференц-залында узды.
Киңәшмәдә катнашучылар икътисадның реаль секторы предприятиеләренә кредит бирү мәсьәләләрен, продукцияне сату базарларын һәм кадрлар потенциалын саклау проблемаларын, шулай ук килеп туган шартларда киләчәктә эшләү принципларын карадылар.
Татарстан Республикасы Премьер-министры Рөстәм Миңнеханов бүгенге көндә республика җитештерүчеләренә булышлык күрсәтүнең өстенлекле бурыч булып калуын искәртте.
“Кризиска каршы тору эше Татарстан Республикасы предприятиеләре һәм эшмәкәрләре ассоциациясе белән тыгыз бәйләнештә алып барылачак”, - дип, ышандырып әйтте Татарстан Хөкүмәте башлыгы.
“Бүгенге көндә икътисади кризис белән көрәш кысаларында кайбер мәсьәләләр, аерым алганда, салым законнары, үз илебез җитештерүчесенә булышлык күрсәтү, дәүләт заказы мәсьәләләре өлкәсенә караганнары, федераль хөкүмәт дәрәҗәсендә чишелергә тиеш”, - дип билгеләп үтте Рөстәм Миңнеханов.
Хәзерге хәлнең торышы турындагы докладлар белән “Серго исемендәге завод” (POZIS) җитештерү берләшмәсе федераль дәүләт унитар предприятиесенең генераль директоры Радик Хәсәнов, “Компрессормаш” ААҖ нең генераль директоры Ибраһим Хисамиев, “Мелита” ААҖ нең генераль директоры Рәис Гомәров, Татарстан Профсоюзлар федерациясе рәисе урынбасары Юрий Слепнев, Татарстан Республикасының Милли банкы рәисе Евгений Богачев һәм башкалар чыгыш ясады.