Ел башыннан “Халык контроле”нә Татарстан халкыннан 9622 уведомление килгән

ТР дәүләт мәгълүмат системасының “Халык контроле”нә гражданнардан килгән уведомлениеләрнең иң күбесе территорияләрне яхшырту һәм юл хәрәкәтен оештыруга карый. Бу хакта бүген ТР Министрлар Кабинетында узган брифингта ТР Кеше хокуклары буенча вәкаләтле вәкил Сәрия Сабурская сөйләде. Брифинг Татарстан Республикасында “Халык контроле” проектын гамәлгә ашыруга багышланган иде.

Сәрия Сабурская ТР дәүләт мәгълүмат системасының “Халык контроле”нең 2013 елның 10 аенда башкарылган эше турында мәгълүмат бирде.
Бу вакыт өчендә “Халык контроле”ндә гражданнардан килгән 9 мең 622 уведомление теркәлгән. Шуларның 5471е хәл ителгән (57%), 1809ы “планлаштырылган” хәлдә (19%), 774е хәл ителә (8%), 1568е кире кагылган (16).

“Халык контроле” 2012 елның апреленнән эшли. Проектның эшли башлау вакытыннан 14 мең 468 уведомление теркәлгән. Шуларның 51%ы уңай хәл ителгән.

Сәрия Сабурская сүзләренчә, иң күп мөрәҗәгатъ территорияләрне яхшыртуга (4644 мөрәҗәгать) һәм юл хәрәкәтен оештыруга (4566 мөрәҗәгать) карый.

Уведомлениеләр буенча иң яхшы эшләүче министрлыклар арасында Сәрия Сабурская ТР Авыл хуҗалыгы һәм азык-төлек министрлыгын (94% хәл ителгән), ТР буенча Эчке эшләр министрлыгы (88%), ТР сәнәгать һәм сәүдә министрлыгы (85), ТР Экология һәм табигый байлыклар министрлыгын (83%) билгеләп үтте.
Республиканың муниципаль районнары арасында күп санда уңай хәл ителгән уведомлениеләр буенча Әгерҗе, Баулы, Зәй, Түбән Кама, Әлмәт районнарын аерып әйтергә мөмкин.

Иң аз санда уңай хәл ителгән уведомлениеләр буенча ТР Хезмәт, мәшгульлек һәм социаль яклау министрлыгын (32%), ТР Транспорт һәм юл хуҗалыгы министрлыгын (37%), ТР Элемтә һәм мәгълүматлаштыру министрлыгын (45%); Әтнә, Яңа Чишмә, Арча, Чүпрәле муниципаль районнарын, Казан, Чаллы шәһәрләрен атарга мөмкин.

Сәрия Сабурская “Халык контроле”е эшендәге тагын бер проблеманы билгеләде: ул уведомлениеләрне карау срогы. Бу срок 10 эш көнен тәшкил итә. Бүгенге көнгә 48% заявканың карау срогы чыккан.