Россия Кулланучылар күзәтчелегенең ТР буенча идарәсенә килгән жалобалар саны узган ел белән чагыштырганда 20%ка арткан

2013 елның 9 ае өчен Россия Кулланучылар күзәтчелегенең ТР буенча идарәсе юридик затларны һәм шәхси эшмәкәрләрне кулланучылар хокукларын яклау өлкәсендә законнарны үтәү буенча 1893 тикшерү уздырган. Бүген бу хакта Татарстан Республикасы Хөкүмәте Йортында узган брифингта Россия Кулланучылар күзәтчелегенең ТР буенча идарәсе җитәкчесе Марина Патяшина хәбәр итте.

Марина Патяшина сүзләренчә, ул җитәкләгән ведомство гражданнарның мөрәҗәгатьләрен караганнан соң, кулланучылар хокукларын яклау буенча административ характердагы төрле чаралар күрә.

Агымдагы елның 9 ае өчен ведомство гражданнарның мөрәҗәгатьләре буенча 1893 тикшерү уздыра. Бу тикшерү нәтиҗәләре буенча административ җәза бирү турында 4457 карар чыгарылган, 449 юридик зат һәм 1336 шәхси эшмәкәр административ җаваплылыкка тартыла. Билгеләнгән штрафларның гомуми суммасы 12,8 млн. сум тәшкил итә.

Барлыгы ведомство тарафыннан гражданнарга кулланучылар хокукын яклау максаты белән судта катнашу өчен 475 бәяләмә бирелгән. 15,6 млн. сум акча кире кайтарылган, шулардан мораль зыян өчен компенсация 200 меңнән артык тәшкил итә.

Марина Патяшина хәбәр иткәнчә, финанс хезмәтләре күрсәтү мәсьәләләре буенча гражданнар мөрәҗәгатьләренең саны ике тапкыр арткан. Быел шундый 282 мөрәҗәгать килгән.

Бүгенге көнгә 121 дәгъва якынча 14 млн. сумга, дәгъвачы файдасына канәгатьләндерелгән. Шул исәптән, мораль зыян компенсациясе буларак 122 мең сум түләнгән.