Татарстан Премьер-министры Рөстәм Миңнеханов: “Кече эшмәкәрлек өлкәсендәге нигезсез тикшерүләр җәмгыятьтә хакимияткә карата тискәре мөнәсәбәт формалаштыралар

Казанда декабрь аенда ук эшмәкәргә “Ашыгыч юридик ярдәм” дигән пилот проектын эшләтеп җибәрү күздә тотыла. Бу турыда бүген Татарстан Республикасы Министрлар Кабинетында узган киңәшмәдә Татарстан Республикасы Кече һәм урта эшмәкәрлекне үстерү комитеты җитәкчесе Тимур Шаһивәлиев хәбәр итте.
Казанның тәҗрибәсе уңышлы булып чыкса, эшмәкәргә “Ашыгыч юридик ярдәм” республиканың башка шәһәр һәм районнарында да эшләп китәчәк.
Киңәшмәдә Татарстан Премьер-министры Рөстәм Миңнеханов билгеләп үткәнчә, Татарстан Республикасы Кече һәм урта эшмәкәрлекне үстерү комитеты тәкъдим иткән ашыгыч юридик ярдәм булдыру идеясе, барыннан да элек, кече бизнеска ярдәм итүгә юнәлтелгән һәм килеп туган икътисади шартларда аеруча актуаль.
Күпсанлы тикшерүләр буенча, кече эшмәкәрлек субъектларын нигезсез җаваплылыкка тарту проблемасы бар. Әйтик, 2008 елның беренче яртыеллыгында гына да республикада, экспертларның исәпләүләре буенча, юридик затларга - 70 меңнән артык, индивидуаль эшмәкәрләргә 20 меңнән артык күчмә тикшерү үткәрелгән.
Рөстәм Миңнеханов сүзләренә караганда, “нигезсез тикшерүләр җәмгыятьтә хакимияткә тискәре мөнәсәбәт формалаштыралар”.
Республикада контроль-күзәтү функцияләрен башкара торган барлыгы 20 дән артык оешма исәпләнә.
Татарстан Республикасы Кече һәм урта эшмәкәрлекне үстерү комитеты җитәкчесе Тимур Шаһивәлиев проектның кече бизнес өчен административ киртәләрне киметүгә юнәлтелүен һәм аның төп бурычлары тикшерүләр санын һәм эшмәкәрләрнең бизнесны оештыруның башлангыч этабындагы чыгымнарын киметү булуын әйтте. “Бүген кече бизнеска ничек тә булса исән калып эшләү мөмкинлеге бирергә кирәк, - диде Тимур Шаһивәлиев. – Бу – эш урыннарын, хезмәт хакларын һәм, шуңа бәйле рәвештә, социаль тотрыклылык һәм салымнарны саклау”.
Эшмәкәрләргә “Ашыгыч юридик ярдәм” Казан башкарма комитеты, Татарстан Республикасы Сәүдә-сәнәгать палатасы, “ОПОРА России” Гомумроссия кече һәм урта эшмәкәрлек иҗтимагый оешмасы белән берлектә күрсәтеләчәк.
Программа республика бюджетыннан һәм федераль бюджеттан финанслана.
Казанда проектны тормышка ашыру белән “”Правис” юридик компаниясе” ААҖ шөгыльләнәчәк.
“Ашыгыч юридик ярдәм” эшләү кысаларында барлык эшмәкәрләргә “кайнар линия” телефоннарын җиткерү күздә тотыла. Анда юрист консультациясен түләүсез алырга, тикшерүнең законлылыгын ачыкларга, кирәк булган очракта – хокукый конфликт килеп чыккан урынга юристлар бригадасын чакырырга мөмкин булачак.
Тимур Шаһивәлиев сүзләренә караганда, эшмәкәрләргә “Ашыгыч юридик ярдәм” программасы Мәскәүдә бик уңышлы эшли һәм эшкуарларда үзен яхшы яктан күрсәтте. Татарстанда бу проект эшмәкәрләр бик еш зарлана торган күп кенә законсыз тикшерүләрдән котылырга мөмкинлек бирәчәк.