2009 елда Татарстан Республикасында халык өчен җылылык һәм электр энергиясенә тарифлар 25 % ка артачак

Бүген Татарстан Республикасы Министрлар Кабинетында яңа елдан тарифларны үзгәртү мәсьәләсендә республика массакүләм мәгълүмат чаралары өчен брифинг булып узды.
Киләсе елда халык өчен җылылык һәм электр энергиясенә тарифлар 25 % ка артачак. Яңа бәяләрне Тарифлар буенча Татарстан Республикасы комитеты билгеләгән. Тарифлар буенча Татарстан Республикасы комитеты җитәкчесе Марина Фәйрушина республика хакимиятләренең тарифларны Тарифлар буенча Федераль хезмәт билгеләгән кысаларда, бер финанс елына раславын искәртте. 2009 елга Россия Федерациясенең Тарифлар буенча федераль хезмәте электр энергиясе бәясен 1 кВт/сәгатькә 2,03-2,07 сум тирәсендә билгеләде. Үз чиратында, республика комитеты халык өчен 1 кВт/сәгатькә 2,04 сум күләмендәге тарифны раслады. Чагыштыру өчен – 2008 елда бу тариф 1 кВт/сәгатькә 1,63 сум тәшкил иткән.
Электр станцияләре тарафыннан электр һәм җылылыкны комбинацияле рәвештә эшләп чыгару режимында җитештерелә торган җылылык энергиясе өчен (ТЭЦ күз алдында тотыла), республика халкы өчен тариф 1 Гкал өчен 384 сум күләмендә билгеләнгән (узган ел 1 Гкал өчен 384 сум булган).
Пар казаннары биналарында эшләп чыгарыла торган җылылыкка тарифлар җылылык энергиясен җитештерү белән шөгыльләнә торган һәр предприятие өчен аерым билгеләнгән.
Татарстан Республикасы халкы тарафыннан кулланылу өчен җибәрелә торган газга ваклап сату бәясе беренче яртыеллыкта, өстәлгән кыйммәткә салымны исәпкә алып, 1 кубометр өчен 2,3 сум тәшкил итәчәк, ә 1 нче июльдән соң 1 кубометрга 2,58 сум булачак. Тарифлар буенча Татарстан Республикасы комитеты республиканың һәр муниципаль берәмлеге өчен коммуналь комплекс оешмаларының товар һәм хезмәтләренә (су белән тәэмин итү, су тарату, агып җыела торган суларны чистарту, каты көнкүреш калдыкларын утильләштерү) бәяләр үзгәрешенең ахыргы индексларын раслады.
Марина Фәйрушина расланган тарифларның 2009 ел дәвамында үз көчендә калуларын һәм республика бюджетына төзәтмәләр кертелгәндә генә үзгәрергә мөмкин икәнлеген ассызыклап үтте. Шул ук вакытта халыктан җылылык, электр энергиясе, газдан файдалану өчен җыеп алына торган ахыргы сумма тарифтан чыгып кына түгел, куллану нормативыннан чыгып та исәпләнә. Соңгылары муниципаль хакимиятләр карамагында, һәм нәкъ менә нормативларны яңадан карау юлы белән муниципаль хакимиятләр халыкның түләүләрен үзгәртә алалар.
Марина Фәйрушина 2008 елда Казанда мондый хәл булганлыгын: шәһәрнең башкарма комитеты кайнар һәм салкын су куллану нормативларын арттыруын билгеләп үтте.