Татарстанда социаль-мәдәни объектларга капиталь ремонт төгәлләнгән

Татарстан Республикасында социаль-мәдәни билгеләнештәге объектларны капиталь ремонтлау буенча гаять зур эш тәмамланган. Быел эш 34 республика, дәүләт һәм федераль программа кысаларында оештырылган. 2025 ел башыннан 15 млрд сумлык 713 объект ремонтланган. Мондый мәгълүматларны ТР Хөкүмәте Йортында узган киңәшмәдә ТР төзелеш, архитектура һәм ТКХ министрының беренче урынбасары Дамир Шәйдуллин китерде.

Киңәшмәне барлык муниципаль районнар белән видеоконференцэлемтә режимында Татарстан Рәисе Рөстәм Миңнеханов уздырды. Киңәшмәдә шулай ук Татарстан Республикасы Премьер-министры Алексей Песошин да катнашты.

Дамир Шәйдуллин искәрткәнчә, Казанда соңгы объектта эшләр тәмамлану белән стационарларны капиталь ремонтлау программасы төгәлләнгән, аның белән бергә «Сәламәтлек саклау» тармагының барлык объектлары да тулысынча гамәлгә ашырылган. «Дәвамлы актив тормыш» илкүләм проекты һәм гомуми финанслау күләме 3 млрд 424 млн сум булган ике республика программасы буенча 226 объект ремонтланган. Аларга 117 фельдшер-акушерлык пункты, 17 участок хастаханәсе һәм амбулаториясе, 17 сырхауханә, 19 стационар, 56 балаларга сөт ризыгы өләшү пункты кергән (яңа республика программасы кысаларында).

Мәгариф өлкәсендә иң зур эшләр башкарылган: 8 программа кысаларында 5 млрд 901 млн сумлык 213 объект ремонтланган, алар «Яшьләр һәм балалар», «Гаилә» илкүләм проектларына, «Авыл территорияләрен комплекслы үстерү» дәүләт программасына һәм 4 республика программасына керә. Аларга 33 мәктәп, интернат-мәктәп, балалар йортлары һәм 23 муниципаль берәмлектә мәктәптән тыш эшләр үзәге кергән.

Моннан тыш, тагын 83 мәктәптә функциональ зона һәм 74 мәгариф учреждениесендә азык-төлек блоклары ремонтланган. 11 балалар бакчасы ремонтланган, 8 ресурс үзәге һәм 4 тулай торак яңартылган.

Яшьләр сәясәте тармагында капиталь ремонтны финанслау күләме 1 млрд 400 млн сум тәшкил итте-бу «Яшьләр һәм балалар» илкүләм проекты кысаларында 34 объект һәм 4 республика программасы. Быел төзекләндерелгән объектлар арасында 8 яшьләр үзәге, 13 балаларны савыктыру лагере, 4 яшүсмерләр клубы, 9 психологик-педагогик ярдәм бинасы бар.

«Мәдәният» тармагында «Гаилә» илкүләм проекты, бер дәүләт һәм ике республика программасы кысаларында 974 млн сумлык 27 объект тулысынча ремонтланган. Объектлар арасында: 19 авыл мәдәният йорты, 3 балалар сәнгать мәктәбе һәм тармакның башка 5 учреждениесе (ике китапханә, бер ЯТТ һәм ике музей).

Татарстан Республикасы Хезмәт, халыкны эш белән тәэмин итү һәм социаль яклау министрлыгы линиясе буенча ике программа кысаларында 982 млн сумлык 80 объект реализацияләнгән. "Кадрлар" яңа илкүләм проекты буенча халыкны эш белән тәэмин итү үзәгенең 49 бинасы ремонтланган, республика программасы буенча 31 социаль хезмәт күрсәтү оешмасы яңартылган.

«Экология» тармагында республика һәм федераль финанслау кысаларында быел гидротехник корылмаларга ремонт ясалган, елгалар үзәннәре һәм күлләр чистартылган. Бу 334 млн сумлык 21 объект.

Башка ведомстволар – Урман хуҗалыгы министрлыгы, Авыл хуҗалыгы министрлыгы, Спорт министрлыгы, Гражданнар оборонасы эшләре һәм гадәттән тыш хәлләр министрлыгы, Татарстан Республикасы буенча ЭЭМ линиясе буенча бер программа буенча гамәлгә ашырылган. Шул исәптән 9 урманчылык бинасын, 5 ветеринария берләшмәсе бинасын, 5 авыл хуҗалыгы һәм азык-төлек идарәсе бинасын һәм «Россельхозцентр» федераль учреждениесенең бер бинасын, 20 спорт объектын, 5 янгын сүндерү-коткару бүлеге бинасын һәм 28 Эчке эшләр министрлыгы бинасын ремонтлау.

Шулай ук башка республика программалары кысаларында 714 млн сумлык 39 объект капиталь ремонтланган. Болар: 10 башкарма комитет бинасы, 18 хәрби комиссариат бинасы, 2 муниципаль архив, 2 җәмәгать судьялары бинасы һәм Росгвардия карамагындагы 7 бина.

42 муниципалитетны үз эченә алган күп фатирлы йортларга капиталь ремонт ясау программасына килгәндә, ул ахырына якынлаша. Дамир Шәйдуллин сүзләренчә, эшләрнең бер проценттан да кимрәген төгәлләргә кирәк. Бүгенгә программа 40 муниципаль берәмлектә тулысынча төгәлләнгән.

874 күп фатирлы йорт ремонтланган. Бүгенге көндә 5 йортта ремонт эшләре бара. Шулай ук торак-коммуналь хуҗалык фонды тарафыннан киләсе елда капиталь ремонт программасы буенча электрон аукционнар үткәрү эше оештырылган. Әйтик, 2026 елда гомуми мәйданы 4 млн кв. метр чамасы булган 706 күп фатирлы йорт ремонтланачак.