ТР Инвестиция-венчур фондының Попечительләр советы “50 иң яхшы инновацион идея” конкурсына йомгак ясады

Бүген Татарстан Премьер-министры Илдар Халиков ТР Инвестиция-венчур фондының Попечительләр советы утырышын уздырды, анда “50 иң яхшы инновацион идея” конкурсына йомгак ясалды. Бүләкләү тантанасы алдыннан булган утырышта шулай ук Россия венчур инвестицияләү ассоциациясе башкарма директоры Альбина Никконен, Фән-техника өлкәсендә кече формадагы предприятиеләр үсешенә ярдәм итү фонды генераль директоры Сергей Поляков катнашты.

Илдар Халиков утырышны ачып, конкурс республиканың инновацион үсешенә ярдәм итүнең уңышлы чарасына әверелде, дип белдерде.

Утырышта 2013 нче елда “Татарстан Республикасы өчен 50 иң яхшы инновацион идея” конкурсын уздыру турында мәгълүмат хәбәр ителде. Илдар Халиков бер ел элек конкурсны оештыру комитеты тарафыннан куелган бурычларның гамәлгә ашырылуын канәгатьләнү белән билгеләп үтте. “Бу гади эш түгел, һәм минем анда катнашкан барлык коллегаларга рәхмәт әйтәсем килә”, - диде ТР Хөкүмәте башлыгы.

Фән-техника өлкәсендә кече формадагы предприятиеләр үсешенә ярдәм итү фонды генераль директоры Сергей Поляков Татарстан белән хезмәттәшлек итү турында сөйләде.

Попечительләр советы вәкилләре шулай ук ТР Инвестиция-венчур фонды эшчәнлегенең башка мәсьәләләре хакында да фикер алыштылар.