Илдар Халиков Татарстан таможнясы эшчәнлегенә 2013 ел өчен йомгак ясау буенча киңәйтелгән киңәшмәдә катнашты

Бүген Татарстан Республикасы Премьер-министры Илдар Халиков Татарстан таможнясы эшчәнлегенә 2013 ел өчен йомгак ясау буенча киңәйтелгән киңәшмәдә катнашты.

Киңәшмәдә Татарстан таможня башлыгы Альберт Мавликов чыгыш ясады. Ул, аерым алганда, Татарстан таможнясы эшчәнлеге зонасында тышкы сәүдә әйләнешенең сизелерлек үсешен билгеләп үтте. Агымдагы елның 11 ае нәтиҗәләре буенча тышкы сәүдә әйләнешенең күләме 7 079,36 млн. АКШ доллары тәшкил иткән (шулардан экспорт – 3 662,45 млн. АКШ доллары, импорт – 3 416,91 млн. АКШ доллары).

Тышкы икътисади эшчәнлектә катнашучылар дөньяның 132 иле белән сәүдә мөнәсәбәтләрендә тора.
Төп товар җибәрүчеләр – “Түбәнкаманефтехим” ААҖ, “Казан вертолет заводы” ААҖ, “Казаноргсинтез” ААҖ, “КАМА” сәүдә йорты” ҖЧҖ, “СГ-ТРАНС” ААҖ, “КАМАЗ” Тышкы сәүдә компаниясе ЯАҖ. Төп товар алучылар – “Форд Соллерс-Алабуга” ҖЧҖ, “Аммоний” ААҖ, “КАМАЗ” ААҖ, “Казан вертолет заводы” ААҖ, В.Д. Шашин исемендәге “Татнефть” ААҖ, “Кастамону Интегрейтед Вуд Индастри” ҖЧҖ.
Федераль бюджетка күчерелгән акча суммасы 19 137,867 млн. сум (2012 елда – 14 591, 22 млн. сум).

Таможня органнары алдында торган төп бурычларның берсе – тышкы икътисади бизнесны алып бару өчен уңайлы шартлар тудыру. Хәзерге вакытта Татарстанда 32 инвестиция проекты гамәлгә ашырыла, алар Татарстан Хөкүмәте тарафыннан өстенлекле дип танылган. Агымдагы ел өчен өстенлекле инвестицион проектларны гамәлгә ашыру кысаларында кертелгән товарларның бәяләр күләме 753 млн. 075 мең АКШ доллары тәшкил иткән.

Идел буе таможня идарәсе башлыгы урынбасары – хокукый хезмәт башлыгы Егор Афонин, киңәйтелгән киңәшмә барышында чыгыш ясап, 2013 елда Татарстан таможнясы алдына куелган бурычларны үтәде, һәм эшчәнлекнең барлык төрләре буенча да яхшы нәтиҗәләргә ирешелде, дип белдерде. Ул Татарстан таможнясы коллективына яхшы оештырылган эшләре өчен рәхмәт белдерде.

ТР Премьер-министры Илдар Халиков Татарстан таможнясы хезмәткәрләренә Татарстан Республикасы Президенты Рөстәм Миңнеханов исеменнән рәхмәт сүзләрен җиткерде.

Киңәшмә тәмамланганда Илдар Халиков Татарстан таможнясы хезмәткәрләренә Татарстан Республикасы дәүләт бүләкләрен тапшырды. Ведомство бүләкләрен Егор Афонин тапшырды.

Бу чарада Татарстан Республикасы буенча Баш Федераль инспектор Ренат Тимерҗанов катнашты.