Алексей Песошин: Татарстан Республикасы буенча Росгвардия идарәсе - илдә иң яхшыларның берсе
Татарстан Республикасы буенча Росгвардия идарәсе гадәттәгечә илдә иң яхшыларның берсе дип таныла. Бу хакта Татарстан Премьер-министры Алексей Песошин Россия Федерациясе Милли гвардия гаскәрләре көнен бәйрәм итүгә багышланган тантаналы чарада белдерде. Бүген хезмәт икеләтә юбилеен билгеләп үтә: Росгвардия оешуга 10 ел һәм хокук тәртибе гаскәрләре оешуга 215 ел.
Казан Ратушасында узган тантанада Татарстан Рәисе Администрациясе Җитәкчесе Әсгать Сәфәров, республиканың хокук саклау структуралары һәм көч ведомстволары җитәкчеләре, ветераннар һәм Росгвардиянең территориаль идарәсе хезмәткәрләре катнашты.
Алексей Песошин ассызыклаганча, 10 ел элек оешкан хезмәт хокук тәртибен саклау, гражданнарның законлы хокукларын һәм мәнфәгатьләрен яклау системасында мөстәкыйль һәм әһәмиятле структурага әверелгән. Ведомствоның шәхси составы җинаятьчелек, террорчылык һәм экстремизмга каршы көрәштә алдынгы урында тора, корал әйләнеше өлкәсендә Россия законнарының үтәлешен контрольдә тота, стратегик объектларны саклау бурычларын үти.
"Росгвардиячеләр башка хокук саклау хезмәтләре белән тыгыз хезмәттәшлектә республика территориясендә зур чаралар үткәргәндә җәмәгать тәртибен саклауны һәм иминлекне тәэмин итәләр. Алар арасында XVI БРИКС саммиты, беренче халыкара „Киләчәк уеннары“, „Россия - Ислам дөньясы: KazanForum“ халыкара икътисадый форумы, „БРИКС илләренең спорт уеннары“, шулай ук башка мөһим вакыйгалар бар», - диде ТР Хөкүмәте башлыгы.
Ул билгеләп үткәнчә, Татарстан Республикасы буенча Милли гвардия хезмәткәрләре махсус хәрби операция барышында куелган бурычларны лаеклы үтиләр: «Без сугышчыларыбызның батырлыгына, шулай ук илнең яңа төбәкләрендә тыныч тормышны җайга салырга ярдәм итүче гвардиячеләрнең батырлыгына һәм ныклыгына тиешле бәясен бирәбез».
Татарстан Премьер-министры билгеләп үткәнчә, республикада милли гвардия бүлекчәләре өчен уңайлы шартлар булдыруга зур игътибар бирелә. Росгвардия объектларына капиталь ремонт ясала, хезмәт автотранспорты паркы яңартыла. Әлеге чаралар оператив-хезмәт эшчәнлегенең нәтиҗәлелеген күтәрүгә ярдәм итә һәм гражданнарның тормыш сыйфатына тәэсир итә.
Шулай ук Татарстанда «Татарстан Республикасы буенча Милли гвардия гаскәрләренең Атказанган хезмәткәре» дигән яңа мактаулы исем булдырылды.
«Татарстан буенча Росгвардия идарәсе шәхси составына намуслы хезмәтләре, батырлыклары, биргән антларына, сугышчан традицияләргә тугрылыклары, шулай ук хокук тәртибен һәм милли иминлекне тәэмин итүгә керткән өлешләре өчен рәхмәт белдерәм. Ышанам ки, Росгвардиянең шәхси составы, хөрмәтле ветераннарның казанышларына тиңләшеп, киләчәктә дә традицияләрне һәм һөнәри осталыкларын арттырачак», - дип өстәде Алексей Песошин.
Татарстан Республикасы буенча Росгвардия идарәсе башлыгы полиция генерал-лейтенанты Рөстәм Гомәров билгеләп үткәнчә, республика җитәкчелеге ярдәме белән матди-техник базаны шактый ныгытуга ирешелгән: хезмәт биналарын төзү һәм капиталь ремонтлау буенча колачлы проектлар гамәлгә ашырылган, автотранспорт, оргтехника паркы яңартылган, хезмәтне башкару өчен заманча шартлар тудырылган.
"Идарәнең иң зур кыйммәте - аның кешеләре. Коллективның фидакарьлеге, профессиональлеге һәм бердәмлеге аркасында без Татарстан территориясендә хокук тәртибен ныгытуга сизелерлек өлеш кертәбез, бу республика җитәкчелеге тарафыннан берничә мәртәбә югары бәяләнде. Кырыс сынауларда безнең хезмәткәрләр һәм хәрби хезмәткәрләр, бигрәк тә махсус бүлекләрнең шәхси составы үз бурычларына тугрылыкларын исбатладылар. Махсус хәрби операциянең беренче көннәреннән үк алар куелган бурычларны намус һәм лаеклы үтиләр, тирән ихтирам уяталар», - дип ассызыклады Рөстәм Гомәров.
Югары профессионализм һәм хезмәттәге уңышлары өчен ведомствоның кайбер хезмәткәрләренә, хәрбиләре һәм ветераннарына дәүләт бүләкләре тапшырылды.
Белешмә өчен:
Росгвардия тарихы эчке сак оешкан көннән башлана. 1811 елның 27 мартында император Александр I Указы белән губерналарда эчке сак хәрби батальоннары оештырыла. Аларга юлбасарлар белән көрәш, качып йөрүче җинаятьчеләрне тоткарлау, халык күңел ачуларын һәм чиркәү бәйрәмнәрен үткәргәндә тәртип урнаштыру, табигать афәтләре вакытында халыкка ярдәм күрсәтү, арестантларны озату һәм башка хокук саклау бурычлары йөкләнгән була.
215 ел эчендә гаскәрләр зур юл узган, шул ук вакытта аларның төп бурычы һәрвакыт үзгәрешсез кала - дәүләтнең эчке куркынычлардан милли иминлеген тәэмин итү яки, аларны булдырган чакта әйтүләренчә, дәүләттә тынлыкны һәм тынычлыкны саклау. Нәкъ менә шул заманча ведомствоның төп бурычларын билгеләде дә инде. 2016 елда Россия Президенты Указы нигезендә башкарма хакимиятнең яңа федераль органы - Россия Федерациясе Милли гвардия гаскәрләренең федераль хезмәте - Росгвардия төзелде. Бүген бу җайга салынган хокук саклау структурасы, аның составында тиз җавап бирүче махсус отрядлар (СОБР), махсус билгеләнештәге мобиль отрядлар (ОМОН), лицензия-рөхсәт бирү эшенең ведомстводан тыш саклау бүлекчәләре, махсус билгеләнештәге авиация бүлекчәләре (АОСН), махсус билгеләнештәге көчләрнең хәрби частьләре, мөһим дәүләт объектларын саклау буенча һәм махсус моторлаштырылган хәрби частьлар эшли.
Узган 10 ел дәвамында Татарстан Республикасы буенча Росгвардия идарәсенең шәхси составы, җәмәгать тәртибен саклауда һәм иминлекне тәэмин итүдә, җинаятьчелеккә, террорчылыкка һәм экстремизмга каршы көрәштә катнашып, хокук тәртибе һәм иминлек сагында кала. Ведомство белгечләре ягулык-энергетика комплексы объектларын тәэмин итү, корал әйләнеше, ЧОО эшчәнлеге, объектларны һәм гражданнарның мөлкәтен шартнамәләр буенча саклау һәм башка бурычлар өлкәсендәге законнарның үтәлешен тикшереп торалар.
2022 елның февраленнән Росгвардия хезмәткәрләре һәм хәрбиләре махсус хәрби операция кысаларында хезмәт-хәрби бурычларны үтәү өчен даими рәвештә хезмәт командировкаларына бара.