Федераль салым хезмәтенең ТР буенча идарәсе башлыгы Марат Сафиуллин: Татарстанда кереме югары булган кешеләр саны арта – 39 кешенең миллиардлаган керемнәре бар
Салым хезмәтенә 2025 ел өчен керемнәр турында декларация тапшыру өчен атнадан аз гына күбрәк вакыт калды. Кампания нәтиҗәләре буенча Татарстан бюджеты 5,5 млрд сумга тулыланырга тиеш. Декларацияне кем тапшырырга тиеш һәм ташламалар кемгә тиеш - бу хакта Татарстан Хөкүмәте Йортында узган брифингта Федераль салым хезмәтенең Татарстан Республикасы буенча идарәсе җитәкчесе Марат Сафиуллин сөйләде.
Нинди керемнәрне декларацияләргә кирәк
3-НДФЛ формасы буенча керемнәр турында декларацияне Татарстанда яшәүчеләргә бу елның 30 апреленнән дә соңга калмыйча салым хезмәтенә тапшырырга кирәк. Ә салымны 15 июльгә кадәр түләргә кирәк, дип белдерде Федераль салым хезмәтенең Татарстан буенча идарәсе башлыгы Марат Сафиуллин.
Аның сүзләренчә, бу салым салуның гомуми системасын кулланучы гражданнарга да, шәхси эшкуарларга да, нотариусларга, адвокатларга һәм арбитраж идарәчеләргә дә кагыла.
Декларацияләнергә тиеш:
милектә булган торакны, җирне һәм транспортны минималь сроктан азрак сату;
милекне арендага тапшыру; кыйммәтле кәгазьләр сату;
лотереядә отыш (4 меңнән 15 мең сумга кадәр);
чит ил чыганаклары;
якын булмаган туганнарыннан кыйммәтле бүләкләр алу.
Шул ук вакытта декларация бирелмәгән очраклар да бар. Мәсәлән, милектә биш елдан артык булган күчемсез милекне сатканда, яки әгәр милек мирас итеп яки гаилә әгъзаларыннан яки якын туганнарыннан бүләккә алынган булса, шулай ук өч елдан да ким булмаган бердәнбер торак сатылган булса.
«2021 елдан башлап балигъ булмаган балалары булган гаиләләр күчемсез милек сатудан керемнәргә салым түләүдән азат ителү хокукы алды. 2026 елдан бу исемлек киңәйде. Хәзер инвалид балалар һәм агымдагы елның 1 гыйнварына кадәр туган балалар исәпкә алына», - дип өстәде Сафиуллин.
«Халык арасында салым дисциплинасы үсеше»
2025 елда республиканың салым органнарына барлыгы 556 мең декларация тапшырылган. Шул ук вакытта салым тотып калуларын гадиләштерелгән тәртиптә белдергән гражданнар саны ике тапкырга диярлек арткан – 2024 елдагы 29 меңнән 2025 елда 55 меңгә кадәр.
"Салым хезмәте 556 мең декларация алды – үткән ел белән чагыштырганда ике тапкырга диярлек күбрәк. Бу халык арасында салым дисциплинасының үсүен күрсәтә", - диде Сафиуллин.
Шунысын да билгеләп үтәргә кирәк, Татарстанда салым түләүченең шәхси кабинетыннан файдаланучылар саны да сизелерлек артты, барлык декларацияләрнең 96%ы цифрлы сервис аша тапшырылган. Декларация кампаниясе нәтиҗәләре буенча республика казнасына барлыгы 5,5 млрд сумнан артык акча керергә тиеш, бу үткән ел белән чагыштырганда 300 млн сумга күбрәк.
100 млн штраф
Федераль салым хезмәтенең Татарстан Республикасы буенча идарәсе башлыгы ассызыклаганча, Татарстанда яшәүчеләр елдан-ел дисциплиналырак була бара, салым хезмәте салым салудан тайпылышларның кимүен теркәп бара. 2025 ел нәтиҗәләре буенча ачыкланган хокук бозулар саны 5 меңгә кадәр кимегән, ә бер ел элек 8 меңнән артык булган.
"Без тикшерүләр уздырдык һәм 100 млн сумлык штрафлар исәпләдек. Быел вәзгыять гражданнарның җаваплылыгын арттыру нәтиҗәсендә яхшырыр дип өметләнәбез", - дип белдерде Сафиуллин.
Ул шулай ук билгеләп үткәнчә, узган елда Татарстанда елына 1 млрд сумнан артык акча эшләүче гражданнар саны арткан – 2024 елдагы 37 кешедән 2025 елда 39 кешегә кадәр.
Сафиуллин өстәп әйтте: узган ел салым түләүчеләр 1 миллионнан 1 миллиард сумга кадәр керемнәр белән 121 мең декларация тапшырган.
"Гражданнарның вакытын һәм тырышлыгын экономияли»
Сүзен йомгаклап Сафиуллин декларацияне Федераль салым хезмәте сайтындагы салым түләүченең шәхси кабинеты яки «ФЛ салымнары» мобиль кушымтасы аша тапшыру уңайлырак, дип сөйләде.
«Операцияләрнең күп өлеше автомат рәвештә башкарыла, бу гражданнарның вакытын һәм тырышлыгын экономияли", - дип ассызыклады Федераль салым хезмәтенең ТР буенча идарәсе башлыгы.
Ул билгеләп үткәнчә, республикада әлеге сервистан 2 миллионга якын кеше файдалана. Сафиуллин аерым ассызыклаганча, салым түләүче шәхси кабинетының функционалы ел саен киңәя.