Татарстан Республикасы Хөкүмәте һәм Bosch компаниясе арасында Теләкләр турындагы килешүгә кул куелды

Бүген Татарстан Республикасы Министрлар Кабинетында Татарстан Республикасы Хөкүмәте һәм Bosch (Robert Bosch GmbH (Bosch) компаниясе арасында Теләкләр турындагы килешүгә кул куелды.
Чарада Татарстан Премьер-министры Рөстәм Миңнеханов катнашты.
Документка Татарстан Республикасының икътисад министры Марат Сафиуллин һәм Bosch ның Россиядәге генераль директоры Вис Херманн кул куйды.
Килешү партнерлык мөнәсәбәтләрен алга таба үстерүне, Bosch немец концернының Татарстан предприятиеләре һәм оешмалары белән ике як өчен дә табышлы булган хезмәттәшлеген күздә тота.
Журналистларга Boschның Россиядәге генераль директоры Вис Херманн хәбәр иткәнчә, Теләкләр турындагы килешүгә кул кую компаниянең Россия белән дә, аның төбәкләре, аерым алганда, Татарстан белән дә мөнәсәбәтләрен яңа дәрәҗәгә чыгарырга мөмкинлек бирәчәк. Аның сүзләренә караганда, Bosch компаниясенең бу төбәктәге төп бурычы – куркынычсызлык системалары базарында үзенең урынын көчәйтү. “Киләчәктә без үзара бәйләнештә тору өлкәләрен киңәйтергә телибез”, - дип билгеләп үтте Вис Херманн әфәнде.
Шуны да искәртик: бүгенге көндә Bosch Татарстанның “КАМАЗ” ААҖ дигән предприятиесе белән актив һәм уңышлы хезмәттәшлек итә; Яр Чаллыда компаниянең бүлендек бүлекчәсе бар.
“Казанның 2013 ел Бөтендөнья Универсиадасын үзендә кабул итү хокукын яулап алуы безгә төрле юнәлешләр буенча яңа проектлар башлап җибәрү мөмкинлеге бирә”, - диде шулай ук Херманн әфәнде.
Татарстанның икътисад министры Марат Сафиуллин журналистларга бүгенге Теләкләр турындагы килешүгә кул куюның Bosch компаниясе инициативасы булуын әйтте.
“Бу безнең өчен “КАМАЗ” ААҖ н компонентлар белән тәэмин итеп тору өлкәсендә, чыннан да, иң мөһим проект, - диде Марат Сафиуллин. – Bosch компаниясе автозаводны электр җиһазлары һәм бензин насосларына кайбер комплектлар белән тәэмин итүнең пионеры булып санала. Бүген без үзара бәйләнешебезне киңәйтергә телибез”.
Бүгенге очрашуда Татарстан Премьер-министры Рөстәм Миңнеханов Татарстан Республикасы Хөкүмәтенең, Bosch компаниясе белән хезмәттәшлек итү өчен, һәрьяклы ярдәм күрсәтергә һәм максималь уңайлылык режимы белән тәэмин итәргә әзер булуын раслады.