Алексей Песошин: АСЕАН илләре Татарстан өчен мөһим һәм перспектив партнерлар булып тора
Татарстан Премьер-министры Алексей Песошин Россия – АСЕАН саммиты кысаларында эшлекле форум ачылышында чыгыш ясады. Чара Б.Рәмиев ис. ИТ-паркта узды.
Татарстан Республикасы Хөкүмәте башлыгы ассызыклаганча, АСЕАН - тотрыклы икътисадый үсеш һәм югары инвестицион потенциал күрсәтә торган динамикалы үсүче ассоциацияләрнең берсе. Россия Ассоциация дәүләтләре белән хезмәттәшлекне эзлекле рәвештә ныгыта, ә ил төбәкләре әлеге багланышларны үстерүгә сизелерлек өлеш кертә.
"Татарстан гадәттәгечә халыкара партнерлык өчен ачык. Республика - Россиянең сәнәгать ягыннан алга киткән алдынгы төбәкләренең берсе, нефть химиясе, машина төзелеше, энергетика, IT-индустрия һәм югары технологияләрнең эре үзәге булып тора. Без махсус икътисадый зоналарны, индустриаль паркларны, инновацион инфраструктураны актив үстерәбез һәм инвесторлар өчен уңайлы шартлар тудырабыз», – диде Алексей Песошин.
Ул ассызыклаганча, АСЕАН илләре Татарстан өчен мөһим һәм перспектив партнерлар булып тора. Республика эзлекле рәвештә сәүдә-икътисадый багланышларны үстерә, сәнәгать, ислам финанслары, цифрлы технологияләр, мәгариф, фән һәм кадрлар әзерләү өлкәсендә хезмәттәшлекне үстерә. Җирле предприятиеләр кооперация элемтәләрен киңәйтү, уртак проектларны гамәлгә ашыру һәм яңа базарларга чыгу белән кызыксыналар.
«Ышанам ки, быелгы форум эчтәлекле диалог, яңа партнерлар эзләү, перспективалы инвестицион инициативалар буенча фикер алышу һәм Россия белән АСЕАН илләре арасында эшлекле элемтәләрне ныгытуга ярдәм итә торган гамәли карарлар эшләү өчен нәтиҗәле мәйданчык булачак», – диде Татарстан Премьер-министры.
Россия Икътисадый үсеш министры Максим Решетников эшлекле форумда катнашучыларга һәм кунакларга Владимир Путинның сәламләвен укыды. Президент билгеләп үткәнчә, быелгы форум аерым әһәмияткә ия, ә Россия белән АСЕАН мөнәсәбәтләренә быел 35 ел тула. «Бу вакыт эчендә без күп планлы хезмәттәшлек тәҗрибәсе тупладык, тотрыклы элемтәләр урнаштырдык, шул исәптән Ассоциациянең эшлекле консультатив советы белән Россия – АСЕАН эшлекле советы арасында да, киләчәккә яхшы нигез булдырдык», – диде дәүләт башлыгы.