Илдар Халиков: ”Зәй ГРЭСы республика энергосистемасының флагманы булды һәм шулай булып кала да”

Бүген Зәйдә Энергетиклар көне һәм Зәй ГРЭСның 50 еллыгына багышланган тантаналы кичә булды. Республиканың зур электостанциясенең юбилей кичәсендә Татарстан Премьер-министры Илдар Халиков катнашты.

Бүген Зәй ГРЭСы егәрлеге буенча илнең 40 зур электростанцияләре рәтендә. Татарстанда Зәй ГРЭСы электроэнергиягә булган ихтыяҗны 30%тан артык тәэмин итә.

Бүгенге тантаналы чарада Зәй ГРЭСы коллективын юбилей белән “Генерирующая компания”ААҖнең генераль директоры Раузил Хазиев котлады.

Республика Хөкүмәте башлыгы электростанция коллективын Татарстан Президенты Рөстәм Миңнеханов исеменнән котлады. “Барлык биш унъеллыкта Зәй ГРЭСы Татарстан энергосистемасында флагман булды һәм шулай булып кала да”,-дип белдерде Илдар Халиков.

Татарстан Хөкүмәте башлыгы Зәй ГРЭСының барлык хезмәткәрләренә хезмәтләре өчен рәхмәт белдерде, станцияне төзегән, шунда күп еллар эшләгән һәм үзләренең тәҗрибәләрен яшь буынга тапшыручы ветераннарга аеруча рәхмәт әйтте.

Илдар Халиков станция хезмәткәрләренә бүләкләр тапшырды. Үз чиратында Раузил Хазиев Илдар Халиковка юбилей хөрмәте белән истәлекле бүләк тапшырды.

Электростанция коллективын Зәй районы башлыгы Татьяна Воропаева котлады, “Сетевая компания” ААҖ нең генераль директоры Илшат Фәрдиев исеменнән дә котлау сүзләре укылды.